Փաստ ինֆո

Չնայած մենք սվիններով ընդունեցինք 2020 թ-ի նոյեմբերի 9-ի համաձայնագիրը, սակայն այն իրավիճակը, որն ունենք այսօր՝ շատ ավելի վատն է, քան նախատեսվում էր այդ համաձայնագրով։

Այս մասին «Փաստինֆոյի» հետ զրույցում ասաց «Ժողովրդավարական համախմբում» կուսակցության նախագահ, քաղաքագետ Սուրեն Պետրոսյանը։

«2020 թ-ից հետո, երբ մենք վերջնականապես ունեցանք տապալված պետություն, անգամ քայլ չձեռնարկեցինք, որպեսզի շտկենք այդ ամենը, այսինքն, մենք քայլ չարեցինք պետականաշինության ուղղությամբ, հակառակը մենք ունեցանք տապալված պետություն ու այդ տապալված պետությունն օր- օրի ավելի է քանդվում, այն ունակ չէ որևէ մարտահրավերի պատասխանել։ Սա իրականություն է, մեր պետությունը հիմա շատ ավելի թույլ է, ավելի կորուստներ ունի, քան ուներ 2020 թ-ի նոյեմբերի 9-ին»։

Նրա արձանագրմամբ՝ մասնավորապես Արցախի կորուստը բացարձակապես չէր բխում 3 տարի առաջ՝ նոյեմբերի 9-ին, ստորագրված փաստաթղթից։

«Այդ փաստաթղթում նշված դրույթներից կեսից ավելին ի կատար չի ածվել, սկսած մեր պատանդների ազատ արձակումից, վերջացրած նրանով, որ զորքերը պետք է կանգնած մնան այնտեղ, որտեղ էին հրադադարից հետո։

Այն ինչ մենք ունեցանք՝ դրա միակ մեղավորն ու պատասխանատուն եղել ենք մենք։ Այստեղ չի կարելի մեղադրել որևէ այլ պետության՝ Ռուսաստանին, ԱՄՆ-ին, ԵՄ-ին, որովհետև այստեղ միայն այդ պայմանագիր չէ, որ խախտվել է, այլ նաև միջազգային հումանիտար իրավունքն է խախտվել։ Հետևաբար, այն, ինչ տեղի է ունեցել մեղավոր ենք մենք և որևէ մեկն իրավունք չունի անգամ միջազգային ինչ-որ նորմերի հղում տալ ու ասել գիտեք՝ դրանք չգործեցին։ Յուրաքանչյուր պետություն ինքն է պարտավոր գտնել այն գործիքակազմերը և այնպիսի քաղաքականություն իրականացնել, որի արդյունքը կլինի իր կենսունակության ապահովումը և իր անվտանգության երաշխավորումը։ Որևէ ուրիշ մեկը դրա համար պատասխանատու չէ»,- նշել է բանախոսը։

Պետրոսյանի դիտարկմամբ՝ սա կարելի էր կանխել։ «Չկա աշխարհում որևէ պետություն, որ կասի, որ այս ամենն անխուսափելի էր, մինչդեռ հենց մեր իշխանությունն է նման արտահայտություններ անում ու դա բացարձակ անհեթեթություն է։ Ամեն բան հնարավոր էր կանխել ու տալ այլ ընթացք։ Բայց քանի որ մենք մեզ չենք դիտարկել որպես դերակատարում, այլ դիտարկել ենք որպես օբյեկտ, որի վրա միայն արտացոլվում են դերակատարների ազդեցությունները, դրա համար էլ ունենք այն հետևանքն, ինչա այսօր տեսնում ենք»։

Նա ընդգծեց, որ անցած 3 տարիներն ի վնաս մեզ են գործել, բայց այսօր էլ մեր ազատ անկումը շարունակվում է։ «Եթե այս պահին սահմանին կրակոցներ չկան, դեռ չի նշանակում, որ կա խաղաղություն, կամ դրան մոտ ինչ-որ բան։ Այս իրավիճակում մեզ անգամ թշնամի պետք չի, մենք ինքներս ենք ավելի արագացնում մեր ազատ անկումը»,- նշել է նա։

Աղբյուր` Փաստինֆո