Փաստ ինֆո

Հայաստանում բնակվող բոլոր հայերն անհանգստացած են Հայաստանի ազգային անվտանգությամբ, եւ երբ որևէ մեկն ասում է, որ Արցախի ինստիտուտների գոյությունը Հայաստանում ազգային անվտանգության հարց է, ապա պետք է հիմնավորի, թե ինչով է վտանգում։ Այս մասին «Փաստինֆոյի» հետ զրույցում ասաց Արցախի Հանրապետության «Արդարություն» կուսակցության նախագահ Հակոբ Հակոբյանը։

«Փաստը ցույց տվեց, որ շատ կարճ ժամանակահատվածում, երբ Հայաստանը Արցախի հետ կապված դիվանագիտական հարցերում, իսկ վերջին շրջանում նաև հողի վրա ֆիզիկապես օգնության հարցերում մի կողմ քաշվեց՝ մենք տեսանք, որ Արցախը կորցրեց իր հայկական լինելը։ Ուստի, այդ թեզը շրջանառելը որևէ իմաստ չունի»,- նշել է Հ.Հակոբյանը։

Անդրադառնալով Գևորգ Պապոյանի մտավախությանը, թե դա կարող է վտանգել խաղաղության պայմանագրի շուրջ գործընթացները, կարող է ռևանշիստական գնահատվել՝ Հակոբյանն ասաց, որ եթե նման տրամաբանությամբ առանջ շարժվենք, ապա ոչ միայն Արցախի Հանրապետության ինստիտուտները, այլև բազմաթիվ այլ հանգամանքներ կան, որոնք թշնամու կողմը կարող է դիտել որպես ռևանշիստական, սկսած հայ ժողովրդի պատմության ուսումնասիրությունից, վերջացրած Արարատ սարի մասին խոսելը կամ պատկերելը։

Երբ դիվանագիտական հարաբերություններերում անում ենք բաներ, որ դուր գանք հակառակորդներին, ապա ստանում ենք հակառակ արդյունքը։ Այստեղ նման վախեր մտցնելն հասարակության մեջ լավ տեղ չի տանում»,- արձանագրել է գործիչը։

Ըստ նրա՝ Արցախի պետական ինստիտուտների պահպանումը, սուբէթնոսի պահպանումը, հոգևոր և ազգային մշակութային առանձնահատկություները մեզ օգնելու են հետագայում, որպեսզի մենք ունենանք այն էթնոսը, որը կկարողանա վերադառնա իր պատմական հայրենիք։ Հակառակ դեպքում մենք կկորցնենք այդ մշակույթը, իսկ 150 000 հայրենակիցները կհամալրեն այն 10 մլն հայերի շարքը, որոնք այսօր զրկվել են իրենց հայրենիքից ու գտնվում են աշխարհի տարբեր երկրներում»։

Հարցին, թե ինչ են անում Արցախի կառավարությունը կամ իշխանություններն այդ ինստիտուտների պահպանման ուղղությամբ՝ նա նշեց, որ առաջիկայում կունենանք առավել առարկայական գործողություններ, որի մասին նաև մամուլը կտեղեկացվի։ «Կարծում եմ, ԱԺ պատգամավորները և կառավարության անդամները ձեռքները ծալած նստած չեն, նրանք առաջիկայում ինչ-ինչ գործողություններ մտածում են, թե դա կլինի կառավարության, թե Ազգային ժողովի նիստերի միջոցով՝ դեռ չգիտեմ, բայց, կարծում եմ, դրա մասին առաջիկայում հնարավոր կլինի խոսել»։

Աղբյուր` Փաստինֆո