Փաստ ինֆո

Իմ տպավորությամբ՝ իշխանությունն ինչ-որ բանից վախենում է, քաղաքական և անձնական վախեր ունի, դրա համար էլ փորձում է տարբեր կերպ վախեցնել իր քաղաքական հակառակորդներին։ Այս մասին «Փաստինֆոյի» հետ զրույցում ասաց քաղտոխնոլոգ Վիգեն Հակոբյանն՝ անդրադառնալով վերջին շրջանում ընդդիմադիր գործիչների ձերբակալություններին։

Նկատենք, որ վերջին շրջանում նոր թափ են ստանում քաղաքական ռեպրեսիաները, արդեն տեղեկություններ կան «Հայրենիք» կուսակցության նախագահ Արթուր Վանեցյանի հնարավոր ձերբակալության մասին։

«Այսինքն, իշխանությունը փորձում է սահմանափակել ընդդիմադիրներին՝ գործողություներ ծավալելու առումով։ Դրա համար էլ դիմում է նման քայլերի, առավել ևս, որ որոշակի «քարտ-բլանշ» ունի, այսպես կոչված, «ժողովրդավարության պապաներից»՝ արևմուտքից։ Նրանք աչք են փակում այդ ամենի վրա և թողնում են, որ նա կարմիր գծերն անցնի։ Իշխանության խնդիրը երկրում պոտենցիալ և իրական ընդդիմախոսների մեջ վախի մթնոլորտ տարածելն է, որպեսզի մարդը մինչև որևէ գրառում անելը ու ելույթ ունենալը՝ հազար անգամ չափի, նոր այդ բանն ասի։ Սա սովորական ռեպրեսիա է»,- նշել է Վիգեն Հակոբյանը։

Ըստ նրա՝ ընդդիմությանը վախի մթնոլորտում պահելու ցանկությունը կարող է նաև կապված լինել սպասվող նոր զիջումների հետ։ «Սա արդեն պարբերական բնույթ է կրում, դրա համար պարբերական բնույթ է կրում նաև քաղաքական բանտարկյալներ ունենալը։

Հիմա, օրինակ, ակտուալ է անկլավների հանձնման հարցը, ու դրա համար է նաև համապատասխան մթնոլորտ ձևավորվում, որպեսզի այդ ֆոնի վրա շատ լուծումներ կամ շատ ընդդիմախոսություններ չլինեն։ Սրան կարող է հաջորդել ադրբեջանցի, այսպես կոչված, փախստականների վերադարձման հարցը։ Այստեղ կարող են ավելի մեծ ընդվզումներ առաջանալ, քանի որ մարդիկ իրենց մաշկի վրա են զգալու ադրբեջանացման հմայքը։ Այսինքն, այդ դեպքում փորձ կարվի ավելի կոշտացնել ռեպրեսիաները»,- ասել է քաղտեխնոլոգը։

Որքանով էլ տարօրինակ է այս իշխանության օրոք՝ իշխանության քայլերը տրամաբանական են, տեղավորվում են իշխանությունը պահպանելու խնդիրը լուծելու տրամաբանության մեջ։ Սա, ինչպես նշեց բանախոսը, արվում է միայն աշխարհի թողտվության պայմաններում, որովհետև նախկինում, եթե որևէ հասարակական գործչի, որը պառկում էր փողոցում կամ ոստիկանների հետ տուրուդմփոցի մեջ էր հայտնվում 3 ժամով տանում էին, հանրային սեկտորի ներկայացուցիչները հայտնվում էին ոստիկանության մոտ, ամբողջ աշխարհով աղմուկ էին բարձրացնում, իսկ «ժողովրդավարության փարոսի» դեսպանն էլ հայտնվում էր նախագահական նստավայրում ու Սահմանադրություն և Մարդու իրավունքների դեկլարացիա էր թափ տալիս։ Հիմա նրանց Նիկոլի իշխանությունը պետք է, նրանք էլ ասում են՝ ինչ գնով ուզում է լինի պետք է անես այն ամենը, ինչ խոսք ես տվել։

«Նա էլ հասկանում է, որ այդ ազատությունն ունի, դրա համար էլ անում է; Եթե չունենա այդ ազատությունը, ոչինչ էլ չի անի։

Այսօր, այս քաղբանկարտկայների «բուծման» համար մեղավորը և իշխանությունն է, և նրա հովանավորները, որոնք աչք են փակում այս ամենի վրա և թույլ են տալիս, որ նա բոլոր տիպի կարմիր գծերն անցնի ու հնարովի բաներով մարդկանց դատեն։ Եթե մարդկանց իրենց գրառումների համար կարելի լիներ դատել, ապա Իլոն Մասկն ու Դոնալդ Թրամփը ցմահ դատապարտված պիտի լինեին»,- նշել է Վ. Հակոբյանը։

Աղբյուր` Փաստինֆո