Փաստ ինֆո

Հայասատանը երբեք ոչինչ չի խոստացել, Հայաստանը հայտարարել է, որ պատրաստ է սահմանների դելիմիտացիայի և դեմարկացիային՝ 1974-75 թթ քարտեզներով։ Այս մասին այսօր լրագրողների հետ զրույցում ասաց «Քաղաքացիական պայմանագիր» խմբակցության պատգամավոր Գևորգ Պապոյանը՝ անդրադառնալով Բաքվի կողմից առաջ քաշվող նոր պահանջներին, որոնք վերաբերում են հայկական 8 գյուղերի։

«Իմ նշած քարտեզներով Տավուշի մարզում մենք ունենք 7-8 գյուղեր, որոնց վարելահողերը ամբողջովին գտնվում են Ադրբեջանի վերահսկողության տակ, երբ սահմանին նայում եք քարտեզով՝ այն զիզագաձև է, իրական սահմանը ավելի ուղիղ է։ Տարբերակներից մեկը կարող է լինել այն, որ սահմանը կարող է մնալ այն տեսքով, ինչ տեսքով կա։ Մյուս տարբերակով կարող է լինել մի տեղ, որտեղ կլինեն վարելահողեր, որոնք մեր գյուղերին են պատկանել ու պետք է նորից անցնեն Հայաստանին, կարող է այնպես լինել, որ մի անտառափեշ տրվի Ադրբեջանին»,- նշել է Պապոյանը։

Նա ընդգծեց, որ խաղաղության պայմանագրի կարևորագույն դրույթներից մեկն այն է, որ պետք է ամրապնդվի, արձանագրվի Հայաստանի տարածքային ամբողջականությունը, ճանապարհների ապաշրջափակումը, ապահովվի տևական խաղաղությունը։ «Այս համատեքստում, կարծում եմ, խաղաղության պայմանագրում չպետք է լինեն կետեր, որոնք ռումբեր կառաջացնեն»։
Դիտարկմանը, թե Ադրբեջանը բնականաբար Արծվաշենը չի պատրաստվում վերադարձնել, բայց ձգտելու են հասնել, օրինակ, Տիգրանաշեն, որը ռազմավարական նշանակություն ունի Հայաստանի համար, հետևաբար, ինչ տարածքային ամբողջականության և տևական խաղաղության մասին կարող է խոսք լինել՝ նա պատասխանեց, որ չգիտի, թե ինչի մասին էր խոսքը։ «Ձեր արտահայտած մտքերը Հայաստանի Հանրապետության մասին չէին, չգիտեմ, թե ձեր տեղեկատվությունը որտեղից»։
Դիտարկմանը, թե Տիգրանաշենը հանձնելու մասին հայտարարել է Նիկոլ Փաշինյանը՝ նա պատասխանեց, որ Փաշինյանը նման բան չի հայտարարել։ «Ձեր մտքերը աբսուրդային էին, չգիտեմ, որտեղից եք վերցրել։ Այդ 8 գյուղերի մասին խոսում է Ալիևը և Հաջիևը»։
Պնդմանը, թե նաև Փաշինյանն է նման բան ասել, այդ թվում՝ Տիգրանաշենը Քյարքի է անվանել՝ Պապոյանը պատասխանեց. «Մի վիճեք ինձ հետ»։

Նշենք, որ Փաշինյանն իրականում այդ մասին է խոսել է Քիշնեւում՝ հայկական համայնքի հետ հանդիպման ժամանակ։ «Դեռ պարզ չէ, որ Ադրբեջանը կուզի Արծվաշենը վերադարձնի՝ Քյարքին վերցնի։ Եթե անգամ այդպես լինի, չեմ ուզում որ այդ հարցի արժեքը գերագնահատենք, անյպիսի անկլավ չկա, որը մեզ համար առաջացնի ճանապարհին այնպիսի պրոբլեմ, որն անլուծելի է։ Ճանապարհը սենց չի անցնի, այնպես կանցնի»,- հայտարարել էր Փաշինյանը։

Աղբյուր` Փաստինֆո