Փաստ ինֆո

Երևանի ընդհանուր իրավասության քրեական դատարանում՝ դատավոր Արամայիս Ասատրյանի նախագահությամբ, այսօր կայացել է ադրբեջանագետ Արմինե Ադիբեկյանի գործով դատական նիստը։ Նախնական դատալսումների ժամանակ, դատավարության կողմերի անձը պարզելուց, մեղադրյալի իրավունքների պարզաբանելուց, բացարկ ներկայացնել-չներկայացնելու հարցի քննարկումից հետո Արմինե Ադիբեկյանի պաշտպան Ռուբեն Մելիքյանը միջնորդեց դադարեցնել Ադիբեկյանի նկատմամբ քրեական հետապնդումը և կարճել վարույթը՝ միջնորդության հիմքում դնելով քրեական հետապնդման առավելագույն ժամկետը լրանալու հիմքով։ Մելիքյանը նկատեց՝ փաստացի մեղադրանքն առկա է 2022թ. սեպտեմբերից, սակայն որևէ գործողություն այդ ընթացքում չի կատարվել, բացի մեղադրյալի հարցաքննությունից, «մեկ էլ հոպ, անհրաժեշտ պահի քրեական հետապնդում է հարուցվում՝ ոչ մի գործողություն չկատարելով»։ Քրեական գործը, Մելիքյանի դիտարկմամբ, զավեշտալի հիմքով է։

Մելիքյանը խնդրեց դատարանին՝ դրսևորել ոչ թե ֆորմալ իրավաբանություն, այլ՝ իրավաբանություն, պաշտպանել ոչ թե մեղադրյալի, այլ մարդու իրավունքները․ «Ժամկետները չհոսելու համար մեղադրանք չի առաջադրվում, անձին զրկում են պաշտպանության իրավունքից, գալիս է, վերջին օրով մեղադրանք են առաջադրում։ Մի քանի օր անց ուղարկում են դատարան։ Արդյո՞ք ընդունելի է այդ պրակտիկան»։

Մելիքյանն ընդգծում է՝ նման բնույթի ենթադրյալ արարքների վերաբերյալ քրեական վարույթները նախաձեռնվում են անձով պայմանավորված, որքան էլ ասեն, որ քրեական վարույթը նախաձեռնվել է փաստի առթիվ, հետապնդումը ՝անձի նկատմամբ։ Հանրային մեղադրողն առարկեց միջնորդության դեմ՝ նշելով, որ այն հիմնավոր չէ և ենթակա է մերժման։ Միջնորդության լուծումը դատարանը հետաձգեց։ Հաջորդիվ՝ քննարկվեց Ադիբեկյանի նկատմամբ կիրառված խափանման միջոցի հարցը։ Հանրային մեղադրողը պնդեց, որ դեռևս անհրաժեշտ է պահպանել Ադիբեկյանի նկատմամբ կիրառված խափանման միջոց բացակայելու արգելքը, մինչդեռ, պաշտպան Ռուբեն Մելիքյանն արձանագրեց, որ ի սկզբանե բացակայելու արգելք խափանման միջոցը կիրառվել էր՝ գրավ վճարելու համար և այն բանից հետո, երբ արդեն վճարվել էր գրավը, բացակայելու արգելք խափանման միջոցը համակցված կիրառելու անհրաժեշտություն առկա չէ, ըստ այդմ, գրավը բավարար է, բացակայելու արգելքը՝ վերացման ենթակա։ Նշենք, որ նախաքննության ընթացքում քննիչը որպես խափանման միջոց կիրառել է գրավը, ուստի, Մելքիյանն ընդգծում է, որ գրավից զատ նաև բացակայելու արգելք կիրառելու համար լրացուցիչ հիմնավորում է պետք, թե ինչ է փոխվել այս ընթացքում․ «Չգիտեմ՝ Ադիբեկյանը նիստից է ուշացել, կա՞պ է հաստատել Գեբելսի հետ։ Այս վարույթով անցնող անձ էլ չկա»;

Դատարանը որոշեց անփոփոխ թողնել խափանման միջոց գրավը և բացակայելու արգելքը։ Հաջորդ դատական նիստը կկայանա դեկտեմբերի 7-ին՝ ժամը 16:00-ին:

Հիշեցնենք, որ Արմինե Ադիբեկյանի նկատմամբ քրեական հետապնդում է իրականացվում ֆեյսբուքյան երկու գրառման համար։ Գրառումներից մեկում Ադիբեկյանը նշել էր՝ «Եթե Փաշինյանը չդիմի Հիտլերի վերջին քայլին, ապա նրան սպասում է Գեբելսի ճակատագիրը»։ Այժմ ադրբեջանագետին մեղադրում են իբրև հրապարակային բռնության կոչեր կատարելու մեջ։

Հեղինակ՝ Իզաբել Սահակյան

Աղբյուր` Փաստինֆո