Փաստ ինֆո

Երբ մարդիկ պարապ են մնում՝ սկսում են տարատեսակ հիշողությունների գիրկն ընկել և տարատեսակ քննարկումների մասին խոսել, հիմա էլ խոսում են այն մասին, թե Ազգային կոմիտեն այս հարցն է քննարկել, այն հարցն է քննարկել։ Իրականում, այլևս էական էլ չէ՝ քննարկել են Ազգային կոմիտեն համալրելու հարցը, թե նրանցից մեկին վարչապետի թեկնածու առաջադրելու հարցը, որն էլ Արման Թաթոյանի կողմից անմիջապես մերժվեց։ Այս մասին «Փաստինֆոյի» հետ զրույցում ասաց քաղտեխնոլոգ Արմեն Բադալյանն՝ անդրադառնալով տարածված տեղեկատվությանը, թե Ազգային կոմիտեի կողմից ներկայացվել է ժամանակավոր կառավարության կազմը՝ Արման Թաթոյանի գլխավորությամբ, ընդհուպ, եղել է քննարկում՝ Թաթոյանի թեկնածությունը վարչապետի պաշտոնում առաջադրելու վերաբերյալ։

Քաղտեխնոլոգի դիտարկմամբ՝ այս քննարկումներն այլևս էական չեն։ «Փաստն այն է, որ երբ մարդիկ պարապ են մնում՝ չգիտեն ինչ անել ու արդյունքում սկսում են ինչ -ինչ թեմաներ քննարկել, որ իրենց մասին չմոռանան։ Իրականում Ազգային կոմիտեն այլևս գոյություն չունի, մեռած կառույց է։

Դիտարկմանը, թե հնարավո՞ր է, որ այս հարտարարություններին կարող են հաջորդել նոր գործողություններ, հնարավո՞ր է թափ հաղորդել շարժմանը՝ քաղտեխնոլոգը արձագանքեց՝ հնարավոր չէ թափ հաղորդել գոյություն չունեցող որևէ բանի։

Հարցին, թե արդյոք Թաթոյանը խուսափում է պատասխանատվությունից՝ նա պատասխանեց, որ իրականում քննարկումն այդպես չեն անում, հատկապես, որ իրեն ոչինչ էլ չի առաջարկվել։

«Իսկ ի՞նչ պետք է անի Արման Թաթոյանը, ասի, որ այ՝ ուրախ եմ, որ իմ անունը քննարկել են, համաձայն եմ հենց հիմա դառնալ վարչապետ։ Եթե Հայաստանում իշխանափոխության հարց դրված չէ՝ նա ի՞նչ պատասխանատվությունից պետք է խուսափի, ինչ լուրջ գործընթաց կա, որ կարող է բերել հաջողության։ Այդպիսի գործընթաց չկա Հայաստանում։

Երբ իշխանափոխություն կլինի ու վարչապետի հարց դրված կլինի, միգուցե կարելիէ քննարկել ու նա էլ կարող է իր դիրքորոշումն հայտնել, երբ արդեն վարչապետի ընտրության հարց կդրվի, բայց նման հարց չկա դրված։

Իրականում այսօր այլևս հասարակությունը չի որոշելու, թե Հայաստանում ով է ղեկավար նշանակվելու։ Հայաստանը դարձել է միայն օբյեկտ, որտեղ այսօր արևմուտքն է որոշում, վաղը կարող է Ռուսաստանը որոշել , հաջորդ օրը կարող է Իրանը որոշել, թե ով է լինելու ՀՀ ղեկավարը։ Հայաստանի հասարակությունն այլևս ոչինչ չի որոշում, դրա համար էլ Հայաստանի հասարակության կարծիքն այլևս էական չէ, կարևոր չէ, թե ինչ է ուզում Հայաստանի հասարակությունը, ում կնշանակեն, նա է էլ կլինի Հայաստանի ղեկավարը»։

Աղբյուր` Փաստինֆո