Փաստ ինֆո

Բնօրրան և ծննդավայր Արցախից՝ Արցախի Հանրապետությունից ոչ մի արցախցի մեկ քայլ անգամ չէր անի, եթե փաշինյանական հակահայ կառավարման արդյունքում չհայտարարվեր, թե՝ Արցախը ադրբեջանի տարածքային ամբողջականության մաս է կազմում՝ այդպիսով ոչ միայն հեշտացնելով ադրբեջանի գործը, այլև՝ Հայաստանի դաշնակից ՌԴ-ի համար անհրաժեշտ դեպքում ալիբի ստեղծելով: Ինն ամիս ադրբեջանական շրջափակմանը դիմակայող Արցախն ու արցախցին՝ հայության հերթական՝ «առաջը՝ ջուր հետևը՝ սուր» բռնագաղթի ճանապարհով աննկարագրելի սարսափների և դժվարությունների միջով հասավ Մայր Հայաստան։

Կասկած չուներ, որ համայն հայության հայրենիքը՝ Հայաստանի Հանրապետությունը փրկության հանգրվան կդառնա իր՝արցախցի հայի համար, քանզի ի՞նչ կապ ունի՝ սյունեցի, տավուշցի ես, թե՞ արցախցի։ Հայ ես, ունես ՀՀ անձնագիր, տարիներ ու տասնամյակներ այն եղել է քո ինքնության վկայականը։ Հազարամյակներ՝ քեզնից առաջ քո հայրն ու պապը, նախնիներդ ապրել են Արցախի սրբազան հողում, քո նախապապերի գերեզմանները և հիշատակներն են այնտեղ, Արցախի հողը հայինն է եղել դար ու դարեր և պատմության մեջ չի եղել ժամանակաշրջան, որ Արցախը հայաթափված լինի այսօրվա հանգույն։

Ցավալի փաստ է այն, որ ՀՀ ներկա իշխանությունը այդ հայաթափման աջակիցը եղավ՝ ամիսներ շարունակ միայնակ թողնելով հայության մեկ մասնիկ Արցախն և արցախցուն։

Այս դավադրության շարունակությունն է այսօր իրականացվում Հայաստանում՝ ներկա իշխանության միջոցով արհեստական դժվարություններ են ստեղծվում Արցախի Հանրապետության՝ բռնի տեղահանված իշխանության և ժողովրդի համար։

Ըստ էության՝ այսօր գործ ունենք Արցախի՝ ԱՀ վտարանդի իշխանության հետ, քանի որ Արցախի իշխանությունն իր բոլոր միավորներով այսօր Հայաստանում է։

Բայց ի՞նչ է անում Հայաստանը, ինչու՞ է ՀՀ իշխանությունը շարունակ պրոբլեմներ ստեղծում առանց այն էլ՝ տառապանքի միջով անցած արցախցիների համար։

Իսկ ՀՀ իշխանությունը, որքան էլ որ Արցախի Հանրապետության պետոլորտի տարեկան բյուջե է հաստատել, այսօր, ըստ էության, իր իսկ մեղքով վտարանդի դարձած ԱՀ իշխանությանը ֆինանսավորելուց հրաժարվում է։

Արդեն իսկ ՀՀ կապույտ անձնագիր ունեցող արցախցիներին փաստորեն, պարտադրում են հանձնել իրենցը և նոր ՀՀ անձնագիր ստանալ՝ այդպիսով նրանց սեփական՝ արցախցի հայի ինքնության մասին փաստող անձնագրից հրաժարեցնելով։

Իրականում քպական իշխանությունն անցել է իր հակահայ քաղաքականության մի նոր փուլի։ Բնականաբար, այս անելանելի վիճակն ստեղծելով նրանք մտածում են, որ արցախցիների մի մասը երկրից կհեռանան, մի մասը ստիպված կլինեն ենթարկվել․․․ Անշուշտ, զգալի հատվածն էլ իրավատեր կլինի։

Արցախցիների անունից խոսելու իրավունք ունեն միայն արցախցիները, քանի որ նրանք այսօր Հայաստանում ունեն պետական բոլոր ինստիտուտները՝ նախագահ, կառավարություն, Ազգային Ժողով, ուստի հարկ կա, որ ՀՀ -ում ստեղծվի մեկ համապարփակ միավոր, որ կկարողանա ընթացք տալ և լուծել արցախցիների խնդիրները։ Իսկ անհրաժեշտ կառույցի ֆինանսավորման համատեքստում կարող է օգնության հասնել «Հայաստան» հիմնադրամը, որը տարիներ շարունակ բազմաթիվ ծրագրեր է իրականացրել Արցախի տարբեր շրջաններում։

Արցախը նրա բնիկներն են, արցախցիները, որոնք գենետիկորեն կրում են իրենց հող ու ջրի, Հայոց Արցախ աշխարհի ոգին ու էությունը։

Եթե ուզում ենք մի օր Արցախ վերադառնալ որպես Տեր, պիտի ազգովի կարողանանք պահպանել արցախցի հայի տեսակը՝ իր պետականության խորհրդանիշերով։ Նրանց ինքնապահպանական բնազդներն ուժեղ են, ուղղակի ողջ հայությունը պիտի աջակից լինի։ Սփյուռքով, տարբեր հիմնադրամներով, այդ թվում՝ «Հայաստան» հիմնադրամով», բարերարների, նվիրատուների միջոցներով։

Իսկ իրականում՝ այս կարգի հարցերը երբեք խոչընդոտ չէին կարող լինել ի նպաստ Հայության քաղաքականություն իրականացնելիս, այս փուլում՝ առաջնահերթ կերպով՝ Արցախի հայության առջև ծառացած խնդիրները լուծելիս, եթե ունենայինք բացառապես հայանպաստ քաղաքականություն վարող իշխանություն։

Աղբյուր` Փաստինֆո