Փաստ ինֆո

Վերջերս շրջանառության մեջ է դրվել մի նոր օրակարգ․ «Խաղաղության խաչմերուկ», արտգործնախարարն էլ ասել է, որ շուտով լավ լուր կստանանք հայ-թուրքայան սահմանի բացման առումով, հարց է ծագում, թե այդ բոլորն ինչի հաշվին է լինելու, ինչի հաշվին է այդ խաղաղությունը, ինչի հաշվին է բացվելու հայ-թուրքական սահմանը։ Այս մասին ֆեյսբուքյան իր տեսաուղերձում ասել է ՀՀ ԱԳ նախկին նախարար Վարդան Օսկանյանը՝ հարց ուղղելով, թե միգուցե Ադրբեջանն ավելի լավ խաղաղության խաչմերուկ դառնա:

«Խաղաղության ամենամեծ գրավականը կլինի այն, որ Ադրբեջանը համաձայնի, որ արցախահայությունը վերադառնա իրենց տները, միջազգային ինչ-որ երաշխիքներով, թեկուզ ինչ-որ աստիճանի ինքնավարությամբ, որ կարողանան իրենց անվտանգությունն ապահովեն։ Այ, դա կլինի ամենամեծ քննությունը Ադրբեջանի և Թուրքիայի։ Բայց հիմա բաց է մնում հարցը, թե ինչի հաշվին է այդ խաղաղությունը լինելու»։

Նա նշեց, որ Նիկոլ Փաշինյանն ու իր իշխանությունն արդեն համաձայնել են ադրբեջանցիների՝ Հայաստան վերադառնալու հարցին:
«Այսօր շրջանառության մեջ է դրվել այն, որ եթե մենք արցախահայերի իրենց տները վերադառնալու հարցը բարձրացնենք, ապա Ադրբեջանը իր քաղաքացիների Հայաստան վերադառնալու հարցը կդնի: Բայց սա արդեն անբարոյականության և անմեղսունակության գագաթնակետն է: Անբարոյականություն է, որովհետև Փաշինյանն ու իր իշխանությունը արդեն մեկ տարուց ավելի է, որ ադրբեջանցների Հայաստան գալու հարցը քննարկում են և համաձայնություն են տվել, անկլավների վերադարձի հարցին են համաձայնություն տվել: Դիվանագիտական անմեղսունակություն է, որ դու թույլ ես տալիս, որ այդ երկուսի վերադարձը նույն հարթության վրա մնան»:

Օսկանյանի խոսքով՝ արցախահայերի իրենց տները վերադառնալու հարցը վերաբերում է նրան, որ նրանք ընդամնենը մեկ ամիս առաջ էթնիկ զտման արդյունքում դարձել են փախստական:

«Այո, Հայաստանում են, բայց նրանք փախստական են, որովհետեւ իրենց տներից դուրս են վռնդվել: Նրանք այսօր իրավունք ունեն իրենց տուն գնան, իրենց հայրենիքը, որտեղ ապրել են սերունդներով, հազարամյակներ, որոնք երբեք Ադրբեջանի կազմում չեն եղել, սովետական շրջանում էլ ունեցել են ինքնավարություն և նախորդ 30 տարում էլ վարել են ինքնավարության պայքար: Այդ երկու հարցերը նույն հարթության վրա դնելը իսկապես դիվանագիտական անմեղսունակության գագաթնակետ է»:

Նա ընդգծեց, որ արցախահայերի վերադարձի հարցը, ի հեճուկս Փաշինյանի, պետք է կենդանի պահել։

«Այսօր պետք է փորձենք ինստիտուցիոնալ միջոցներ գտնել, որ այդ հարցը դնենք միջազգային հանրության առաջ, որ չմոռացվի, ինչպես կարգավիճակի հետ կապված, երբ արհամարվեցին այդ կոչերը, գնացին այդ ճանապարհով եւ մոռացվեց, ստացանք Արցախ, որտեղ չկա հայություն, նույնը լինելու է այսօր, մի քանի ամսից այս հարցն ընդհանրապես մոռացվելու է: Դրա համար այդ հարցն այսօր պետք է դարձնել գլխավոր օրակարգային հարց, բայց ես իրոք հույս չունեմ, որ այս իշխանությունները կգնան այդ ճանապարհով»:

Աղբյուր` Փաստինֆո