Փաստ ինֆո

Պատերազմում զոհված Մխիթար Գալեյանի հայրը՝ Գարիկ Գալեյանն ազատ արձակվեց։ Երևանի ընդհանուր իրավասության քրեական դատարանը՝ դատավոր Մասիս Մելքոնյանի նախագահությամբ, վերացրեց կալանքը, որպես խափանման միջոց կիրառեց գրավը՝ 2 մլն դրամի չափով, տնային կալանքը՝ 2 ամսով։ Դատարանը որոշեց ազատ արձակել Գալեյանին՝ հենց նիստերի դահլիճից։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանի քրեական դատարանում՝ դատավոր Մասիս Մելքոնյանի նախագահությամբ, ընթանում է Արցախյան երրորդ՝ 44-օրյա պատերազմում նահատակված Մխիթար Գալեյանի հոր՝ Գարիկ Գալեյանի գործով, նախնական դատալսումները։ Զոհված զինծառայողների ծնողները, որոնք դատական նիստերի դահլիճում էին՝ Գարիկ Գաելյանին իրենց աջակցությունը հայտնելու, Գալեյանին ծափահարություններով դիմավորեցին։ Պաշտպանության կողմը դատախազին բացարկ չհայտնեց՝ նշելով, որ թեև նախաքննության ընթացքից բացարկի հիմքեր կան, բայց դատախազությունը մեկ միասնական համակարգ է դիտարկվում, հետևաբար, բացարկ չի հայտնի կոնկրետ դատախազին։ Հանրային մեղադրող Արմեն Բեգլարյանը միջնորդեց երկարացնել Գալեյանի կալանքի ժամկետը ևս երեք ամսով՝ նշելով, որ առկա են խոչընդոտման՝ գործով անցնող անձանց նկատմամբ անօրինական ազդեցություն ունենալու, նոր հանցանք կատարելու, փախուստի դիմելու ռիսկերը։ Հիմնավորելով նոր հանցանք կատարելու հավանականությունը՝ դատախազը նշեց, որ մեկ այլ գործով մեղադրյալի դատավարական կարգավիճակի, խափանման միջոցի կիրառված լինելու պայմաններում նոր հանցանք է կատարել։ Պաշտպան Վահան Հովհաննիսյանն էլ նախ հորդորեց դատախազին՝ չխախտել անմեղության կանխավարկածը, ապա միջնորդեց Գալեյանի նկատմամբ ընտրված խափանման միջոց կալանքը տնային կալանքով, բացակայելու արգելքով և գրավով՝ 2 մլն դրամի չափով։

Փաստաբանն ընդգծեց՝ խոչընդոտման հավանականության մասին խոսք լինել չի կարող։ Նախ՝ թմրամիջոցների դրվագով Գալեյանն ընդունել է մեղքը՝ նշելով, որ գտնվել է ծանր հոգեբանական վիճակում և պայմանավորված գլվուղեղում բեկորային վնասվածքով՝ ցավեր է ունեցել։ Ինչ վերաբերում է խուլիգանության դրվագին, ապա փաստական կողմը, այն է՝ ջրի շշով հարվածելը՝ Գալեյանն ընդունում է, բայց համաձայն չէ իրավական որակման հետ։

Հիշեցնենք, որ Գարիկ Գալեյանին մեղադրանք է ներկայացվել երկու հոդվածով՝ խմբի կազմում խուլիգանության և իրացնելու նպատակով թմրամիջոց պահելու հատկանիշներով։ Ընդ որում, խուլիգանության հատկանիշներով մեղադրանքը ներկայացվել է հենց Գալեյանի հաղորդման հիման վրա հարուցված գործով։ Մասնավորապես, անցած տարվա ընթացքում ՀՀ գլխավոր դատախազության շենքի մոտ իրականացվող ակցիայի ընթացքում իշխանական սադրիչներից մեկը փորձել էր միջամտել ակցիային, Գալեյանը իր ձեռքի շշով ջուրը լցրել էր նրա գլխին, արարքը որակվել է որպես խմբի կազմում խուլիգանություն։ Միջադեպի ընթացքում վասվածքներ են ստացել հենց ծնողները՝ Վահիդ Սահակյանը, Գարիկ Գալեյանը, ինչով պայմանավորված էլ հաղորդում են ներկայացրել։

Հեղինակ՝ Իզաբել Սահակյան

Աղբյուր` Փաստինֆո