Փաստ ինֆո

Արցախից բռնի տեղահանված թոշակառուներն ու նպաստառուները կստանան իրենց հասանելիք կենսաթոշակներն ու նպաստները․ համապատասխան նախագիծը քննարկվում է ՀՀ աշխատանքի և սոցիալական հարցերի նախարարությունում։ Կառավարության այսօրվա նիստում այդ մասին հայտարարեց փոխվարչապետ Տիգրան Խաչատրյանը։

«Կենսաթոշակների իրավունքն օրենքի ուժով ծագել է ԼՂ-ից բռնի տեղահանված մեր հայրենակիցներին փախստականների կարգավիճակին հավասարեցված ժամանակավոր պաշտպանության կարգավիճակ տալուն զուգահեռ։ Ընթացակարգային խնդիրներ կան․ կենսաթոշակների մասին ՀՀ օրենսդրությանը համապատասխանեցնելու փուլում ենք, ու որպեսզի սահուն լինի այդ ամենը, նախագիծ են մշակում աշխատանքի և սոցիալական հարցերի նախարարության գործընկերները։ Առաջիկա շաաբթվա ընթացքում այդ փաթեթն էլ, հավանաբար, ավարտական տեսքի բերված կլինի, և Կառավարության հաջորդ նիստում այն կներկայացվի»,-ասաց Խաչատրյանը՝ հավելելով, որ դա թույլ կտա, որպեսզի հոկտեմբերի 25-ից՝ երբ նրանց տրվել է ժամանակավոր պաշտպանության կարգավիճակ, վերականգնենք օրենքով սահմանված կենսաթոշակի իրավունքը։

Վարչապետն էլ հայտնեց, թե ԼՂ-ից բռնի տեղահանված մեր հայրենակիցներն արդեն իսկ դիմում են ՀՀ քաղաքացիություն ստանալու համար (նկատենք, որ Արցախի մեր հայրենակիցներն ունեն ՀՀ քաղաքացու անձնագիր ու հանդիսանում են ՀՀ քաղաքացի,-խմբ) «Գործընթացին, բնականաբար, սպասում էինք։ Այն ունի օրենսդրական նրբություններ, որոնք պետք է պահպանվեն։ Առաջիկայում նաև սպասվում է 50+50 ծրագրի իրագործումը»,-նշեց Փաշինյանը։

Աղբյուր` Փաստինֆո