Փաստ ինֆո

Ասել, որ հասարակությունն հաշտ է այն քաղաքական իրողությունների հետ, որ առկա չեն՝ սխալ կլինի, հասարակությունը հաշտ չէ, բայց որոշակի ապատիկ վիճակում է։ Այս մասին «Փաստինֆոյի» հետ զրույցում ասաց հոգեբան Միհրդատ Մադաթյանը, ով առաջիկայում կստանա ԱԺ պատգամավորական մանդատը։

«Կարծում եմ, մարդիկ չեն հավատում, որ իրենց ձայնով կամ բողոքով կարող են որևէ բան փոխել, հատկապես, որ ռեպրեսիաներ են կիրառվում, քաղաքական լկտի խոսք է հնչեցվում քաղաքական բարձր պաշտոններ զբաղոցնողների կողմից։ Բնականաբար սա բերում է վախի մթնոլորտի, ապատիայի, թերահավատությանը, որ ոչինչ չի փոխվելու։ ժողովրդական խոսք կա, կարծում են՝ «Ընկել ես՝ պիտի քաշես»։

Ինչ վերաբերում է ընդդիմության իներտ վիճակին, ապա հոգեբանի դիտարկմամբ՝ ընդդիմությունն իր ունեցած ռեսուրսներով փորձում է աշխատել՝որքան հնարավոր է։ «Այսօր նույն ընդդիմությունը լուրջ ռեպրեսիաների է ենթարկվում, հետևաբար, քննադատել ընդդիմությանը նույնպես սխալ կլինի։ Որքա՞ն ընդդիմադիր գործիչ կա այսօր բանտերում՝ նրանք իրենց աշխատանքի արդյունքում են մինչև հիմա բանտարկված։

Կարծում եմ, իրականում ընդդիմությունն ամեն ջանք գործադրում է իրավիճակ փոխելու համար, արդյունավետ են, թե ոչ, կարողանում են, թե ոչ՝ սա արդեն երկրորդական հարց է, քանի որ տարբեր մարդիկ տարբեր սպասումներ ունեն ու հնարավոր չէ բոլորի սպասումներն արդարացնել», - նշել է մեր զրուցակիցը։

Մեկ բառով ինչպես կարելի է բնութագրել իշխանության գործողություններն այսօր՝ մեր հարցին ի պատասխանը Մ.Մադաթյանն արձագանքեց՝ «լկտիություն»։ «Բացարձակ լկտիացել են, մոտեցել են լափամանին, լափում են ու լկտիացել են, ուրիշ բան չի կարելի ասել։ Ինչ ուզում են՝ անում են, ոնց ուզում են մեկնաբանում կամ արդարացնում են իրենց, թեև վերջերս սկսել են չարդարացնել, ասում են՝ լավ ենք անում։

Այս իրավիճակը շարունակվում է, ու մենք կամաց-կամաց հասնում ենք անհայրենիք ցեղի կարգավիճակի, կորցրել ենք ազգային դիմագիծը, ազգային հոգեբանությունը։ Եթե այսպես շարունակվի գնչուների նման կապրենք տարբեր երկրներում, որն ամեն տեղ կա, բայց բայց իրենից ոչինչ չի ներկայացնում»,- նշել է հոգեբանը։

Աղբյուր` Փաստինֆո