Փաստ ինֆո

Իրավիճակը վերահսկելի է, ունենք կարմրուկի բռնկման մարում։ Իհարկե, մեր զգոնությունը դրանից չի իջնում, հնարավորինս բոլոր ԲԿ-ներում բոլոր նախանշանները, որոնք կարող են լինել կարմրուկի պարագայում, հետաքննվում են և արվում են բոլոր հետազոտական աշխատանքները, որպեսզի որևէ բան բաց չթողնենք։ Այս մասին լրագրողների հետ զրույցում ասաց ՀՀ առողջապահության նախարար Անահիտ Ավանեսյանը։

«Այո՛, ցավալի է, որ ունեցել ենք բալիկի մահվան դեպք։ Ցավով նշեմ, որ բալիկը պատվաստված չի եղել և ունեցել է այլ հիվանդություն, որն իրավիճակն ավելի բարդացրել է։ Դրա համար բոլոր պատվաստումները թող չուշացնեն, որպեսզի նման դեպքեր չունենանք։ Մինչ քովիդը ունեինք 93-94 տոկոս պատվաստում, քովիդի ժամանակ բավական իջել էր, քանի որ ունեինք աշխատանքների խաթարում։ 2022-ին վերականգնել ենք մեր ցուցանիշները, հույս ունենք, որ այս տարի ևս պետք է ունենանք բավարար ցուցանիշ։ Խնդիր ենք դրել, որ հասնենք 95-96 տոկոսի՝ ըստ տարիքային շեմի և ամեն ինչ պետք է անենք, որ դրան հասնենք»,- նշեց Ավանեսյանը։

Անդրադառնալով կորոնավիրուսի հնարավոր նոր շտամերին՝ Ավանեսյանը նշեց, որ որևէ նոր շտամ չկա, դրանք օմիկրոնի ենթաշտամներն են։ Նրա խոսքով՝ լինում է, երբ գրիպն ու քովիդը համատեղ են լինում անձի մոտ և դա, իհարկե, շատ ավելի բարդ ընթացք է ունենում։ Նախարարը վստահեցրեց, որ այս պահին անհանգստացնող իրավիճակ չունենք, զգուշությունը պետք է պահպանել, եթե ունենք նշաններ, ապա հնարավորինս քիչ մարդու հետ պետք է շփվել, որ վարակը չտարածվի․ «Դա վերաբերում է ոչ միայն քովիդին, այլ նաև գրիպին, կարմրուկին և, իհարկե, դիմել բժշկի»։

Աղբյուր` Փաստինֆո