Փաստ ինֆո

Վարչապետի աշխատակազմի ղեկավարի տեղակալ Արմենակ Խաչատրյանի կարծիքով ամերիկացի հայտնի ռեփեր Սնուփ Դոգի (Snoop Dogg) համերգի կազմակերպումը Հայաստանի համար կենսական էր։ Այդ մասին նա խոսել է այսր՝ ԱԺ-ում տեղի ունեցած ճեպազրույցում։

Հիշեցնենք, որ համերգը նախատեսված էր սեպտեմբերի 23-ին, սակայն հետաձգվեց՝ Արցախի դեմ Ադրբեջանի սանձազերծած պատերազմի հետեւանքով։Մինչդեռ հոնորարի գումարն ամբողջությամբ արդեն վճարվել է։ Թե երբ կլինի համերգը՝ Ա.Խաչատրյանը դժվարացավ պատասխանել։

«Ես հիմա չեմ կարող կոնկրետ օր նշել, բայց ամեն ինչ արվում է, որ գա», - ասել է նա:

Հարցին՝ ինչու է համերգի կազմակերպումը մեկ անձից գնումով իրականացվել, կամ եթե դրամաշնորհ է հայտարարում կառավարությունը, ինչու բաց մրցույթ չի հայտարարվում՝ Խաչատրյանը նշել է. «Կոնկրետ այս դեպքում շատ կոնկրետ առանձնահատկություն կա: Կոնկրետ կազմակերպությունը պայմանավորվածություն է ձեռք բերել արտիստի հետ, ջանք էր գործադրել, որից հետո դիմել էր կառավարությանը աջակցության խնդրանքով: Կառավարությունն էլ որոշել էր չմերժել»:

Լրագրողի հարցին` սոցիալական այս ծանր իրավիճակում կենսակա՞ն էր այդ համերգը կազմակերպումը՝ Խաչատրյանը պատասխանեց. «Ցանկացած միջոցառում, որ կառավարությունը նախատեսել է անել, այո»:

Հիշեցնենք, որ Սնուփ Դոգի համերգի համար ՀՀ կառավարության որոշմամբ ՀՀ պետական բյուջեի միջոցներից «Մշակութային միջոցառումների իրականացնում» ծրագրի շրջանակներում գանձապետարանում հաշվառվել է 2.318.596.800 դրամ գումարի պայմանագիր։ Այդ գումարն օգոստոսի 25-ին ամբողջությամբ վճարվել է։ Վճարված գումարի վերադարձ չի իրականացվել։

Աղբյուր` Փաստինֆո