Փաստ ինֆո

Կառավարությունը երբեք որևէ դատավորի չի զանգում, չի ստիպում այս կամ այն գործով որոշում կայացնել։ Այս մասին ԱԺ-ում հայտարարել է ՀՀ արդարադատության նախարար Գրիգոր Մինասյանը։

ԱԺ-ում բյուջեի քննարկման ժամանակ «Հայաստան» խմբակցության պատգամավոր Գեղամ Նազարյանն ուշադրություն հրավիրեց կալանավորումը որպես խափանման միջոցի կիրառման լայն տարածում ունենալու առնչությամբ։ Նազարյանը, թեև անուններ չնշեց, սակայն արձանագրեց, որ կինը, որն ունի առողջական խնդիրներ, գտնվում է կալանքի տակ, նրա կալանքը չի փոխվում։
«Մարդը մասնակցել է ինչ-որ քաղաքական ցույցի, ըստ մեղադրական կողմի, անկարգության որոշակի դրսևորում է ունեցել, իրեն պարտադիր պե՞տք է ամիսներ շարունակ կալանքի տակ պահել: Կա անչափահաս, որը ցույցերից շաբաթներ անց անհասկանալի պատճառներով ձերբակալվում և կալանավորվում է», - ասաց պատգամավորը՝ հետաքրքրվելով՝ քաղաքական կա՞մք չկա:

Գրիգոր Մինասյանն էլ վստահեցրեց, որ կառավարությունն իր կողմից ապահովում է դատական իշխանության համար անկախ ու ազատ գործելու բոլոր միջոցների իրականացումը ժամանակին և ճիշտ ձևով։ Մինասյանը նշեց, որ պատգամավորի դիտարկումը վերաբերում էր «Աբովյան» ՔԿՀ-ում այժմ գտնվող Տաթևիկ Վիրաբյանին:

«Նա ունեցել էր ուշագնացություն: Գործադիրի գործառույթը հետևյալն է՝ եթե մարդը գտնվում է մեր վերահսկողության տակ, շատ արագ արձագանքել: Երբ նա անհրաժեշտություն էր ունեցել, մեր բուժհաստատության ներկայացուցիչները տեղ էին հասել, բոլոր միջոցները ձեռնարկել: Ենթադրում եմ, որ այդ մարդիկ ձեր քաղաքական թիմի անդամներն են, և դրա համար եք դուք ուզում այդ քրեաիրավական շղթան փաթեթավորել որպես քաղաքական», - արձագանքեց Մինասյանը:

Գրիգոր Մինասյանը պնդեց, որ դատարանն այսօր գործում է շատ անկախ, ապացույցն էլ այն է, որ իրենց քաղաքական թիմի ներկայացուցիչներն էլ են կալանավորվում։

Աղբյուր` Փաստինֆո