Փաստ ինֆո

Դատավոր Վահե Դոլմազյանը կշարունակի քննել ՀՀԿ փոխնախագահ Արմեն Աշոտյանի և մյուսների վերաբերյալ քրեական գործը։ Քիչ առաջ Դոլմազյանը մերժեց Արմեն Աշոտյանի փաստաբանների ներկայացրած ինքնաբացարկի միջնորդությունը՝ նշելով, որ բերված պատճառաբանությունները բավարար չեն ինքնաբացարկի համար։

Ինչպես արդեն տեղեկացրել ենք՝ ՀՀԿ փոխնախագահ Արմեն Աշոտյանի պաշտպանական թիմը ինքնաբացարկի միջնորդություն է ներկայացրել՝ կասկածի տակ առնելով դատավորի անկողմնակալությունը, իսկ փաստաբան Տիգրան Աթանեսյանը նաև դատավորի մասնագիտական կարողությունները։

Միջնորդության հիմքում փաստաբանները դրել են դատավորի կողմից նախորդ նիստերում դրսևորած շտապողականությունը՝ հնարավորինս արագ Աշոտյանի կալանքի երկարացման որոշումը կայացնելու, քրեադատավարական նորմերի պահանջները չապահովելը, «մեղադրանքի» կողմի գործառույթը ստանձնելու և այլ հանգամանքներ։
Վահե Դոլմազյանը մերժեց միջնորդությունը։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Պաշտպանների ծանրաբեռնվածությամբ պայմանավորված՝ դատական նիստը հետաձգվեց՝ մինչև նոյեմբերի 6-ը, ժամը՝ 16,00-ն։ Հաջորդ նիստին կքննարկվի տուժողների՝ հնարավոր հետագա մասնակցության հարցը։ Նիստը փակվելուց հետո դատական նիստերի դահլիճում գտնվող Նաիրա Զոհրաբյանը հայտարարությամբ հանդես եկավ՝ նշելով, որ քանի որ քաղբանտարկյալների, բռնաճնշումների նիստն ավարտվել է, ամեն ինչ կարող է ասել։

«Նման դատական նիստ, որին անգամ տուժողի օրինական իրավահաջորդը չի ասում տուժող լինելուց։ Սա քաղաք ֆարս է»,- նշեց Զոհրաբյանը՝ հայտարարելով, որ Արմեն Աշոտյանը քաղբանտարկյալ է։

Հեղինակ՝ Իզաբել Սահակյան

Աղբյուր` Փաստինֆո