Փաստ ինֆո

Այն, ինչ կատարվեց անցյալ նիստում այս դահլիճում և կատարվում է ՀՀ այլ դահլիճներում, բովանդակային առումով ոչնչով չէր տարբերբում մեր հայրենակիցների և Արցախի ռազմաքաղաքական վերնախավի նկատմամբ Բաքվի դատարաններում տեղի ունեցող վակխանալիայից։ Երևի միայն աշխատանքային լեզուն էր տարբեր։ Ադրբեջանական դատարաններում կատարվածը ՀՀ գործող վարչախումբն ինչ ասես չասեց՝ ֆարս, բեմադրություն։ Ճիշտ են ասում։ Այս մասին դատարանում հայտարարեց ՀՀԿ փոխնախագահ Արմեն Աշոտյանը՝ միանալով դատավորին բացարկ հայտնելու միջնորդությանը։

Նախագահող դատավոր Վահե Դոլմազյանն ընդհատեց՝ հորդորելով խոսել ըստ էության․ «Մեղադրյալ Աշոտյան, Դուք գիտեք ինչի մասին եք խոսում, բայց դատական նիստի կարգը որոշում է դատավորը։ Դատարանն ունի սահմանափակելու դատավարության մասնակիցների կողմից իրենց իրավունքների չարաշահումը»։ Փաստաբան Տիգրան Աթանեսյանն էլ առարկեց դատավորի գործողությունների դեմ․«Հենց ադրբեջանական բառն եք լսում, նեղվում եք։ Այն, որ կալանքը երկարացնում եք, չեք նեղվում, դրանից նեղվում եք։ Ձեզ չի վիրավորել, ոչ ոքի չի վիրավորել։ Իր խոսքը գնահատական է, մարդը չի կարող իր կարծիքի համար այստեղ հետապնդման ենթարկվել։ Եթե լռեցնելու եք, եկեք չմասնակցենք, բոլորս գնանք դատարանից»։

Արմեն Աշոտյանն էլ արձանագրեց՝ իր խոսքը անվստահություն հայտնելու մասին է՝ ըստ էությամբ։

«Երբ նեղվում եք ադրբեջանական բանտերի հետ զուգահեռներից, խի եք նեղվում։ Ձեր վարչապետն է ասել՝ թուրք ասելուց չի նեղվում։ Համաձա՞յն եք նրա հետ՝ մի նեղվեք, համաձայն չե՞ք նրա հետ՝ ինչու եք նման վճիռներ կայացնում։ Հասկացեք այս տրամաբանական դիլեմման»,- նշեց Արմեն Աշոտյանը, ինչին արձագանքելով Դոլմազյանը, նշեց, որ արդարադատություն իրականացնելիս դատարանն անկախ է։ Դատավորի հայտարարությունն առաջացրեց դահլիճում գտնվող անձանց ծիծացը, դատավորն էլ նախազգուշացրեց Նաիրա Զոհրաբյանին՝ դուրս կհրավիրի դահլիճից։

Աշոտյանը նիստը նախագահող Վահե Դոլմազյանին ասաց, թե չի կարող իրեն գրաքննության ենթարկել։

«Դուք կարող եք որոշել ընթացքը, բայց չեք կարող որոշել իմ մտքի, խղճի, արտահայտվելու ազատությունը։ «Ադրբեջանական» բառը վիրավորանք է, հասկանանք, որ վիրավորանք է, Դուք ճիշտ եք, Նիկոլը՝ սխալ։ Գործող վարչախումբը ադրբեջանական դատարանների որոշումներին տվեց ճիշտ ձևակերպում, այո՛, ֆարս է, բայց մի հատ ձեր աչքի փուշն էլ տեսեք, գործո՛ղ վարչախումբ», - ասաց Աշոտյանը։
Արմեն Աշոտյանն էլ նշեց՝ թող միանգամից վճիռը հրապարակեն, դա էլ երևի արդեն ունեն, «վոթսափով» են երևի ուղարկել։

«Ինձ սրա համար են նստացրել, հիմա էլ Դուք զրկում եք ինձ խոսքի իրավունքից այս դատական դահլիճում։ Խի եք նեղվել «Ադրբեջան» բառից, երկրի ղեկավար ներկայացող մարդը երևի գիշերն էլ է այդ բառը արտաբերում, խի եք նեղվել»,- ասաց Աշոտյանը, ինչին արձագանքելով, Դոլմազյանն ասաց․ «Դուք շատ եք սիրում այդ բառը»։

«Ես շատ եմ սիրում այդ բառը՝ մանավանդ իր կատարմամբ, Դուք էլ իրեն եք երևի սիրում»,- ասաց Աշոտյանը, ինչին արձագանքելով Դոլմազյանն ասաց՝ «Ինչքան Դուք եք սիրում»։

Արմեն Աշոտյանն ընդգծեց՝ բացարկը հայտնում են ոչ թե իր, այլ՝ դատավորի համար, «շանս» է տալիս․ «Ձեր խաթր ենք բացարկ հայտնում։ Խորը շունչ քաշեք, գցեք Ձեր վրայից, այս գործը Ձեր հագով չէ»։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո