Փաստ ինֆո

Դատավոր Վահե Դոլմազյանը շտապում էր հրապարակել Արմեն Աշոտյանին ևս երեք ամսով կալանավորելու որոշումը։ Այս մասին դատական նիստում հայտարարեց Արմեն Աշոտյանի պաշտպանական խմբի անդամ Ռուբեն Մելիքյանը՝ ներկայացնելով բացարկի միջնորդությունը։

«Փաստինֆո»-ի թղթակցի հաղորդմամբ՝ Հակակոռուպցիոն դատարանում՝ դատավոր Վահե Դոլմազյանի նախագահությամբ, շարունակվում է ՀՀԿ փոխնախագահ Արմեն Աշոտյանի, ԵՊԲՀ նախկին ռեկտոր Միքայել Նարիմանյանի, ԵՊԲՀ նախկին հաշվապահ Լարիսա Պարսեղյանի, դեղագետ Մարթա Սիմոնյանի, Ռոլան Դավթյանի վերաբերյալ գործով դատավարությունը։

ՀՀԿ փոխնախագահ Արմեն Աշոտյանի պաշտպանները դատավոր Վահե Դոլմազյանին ինքնաբացարկի միջնորդություն են ներկայացրել՝ նոր ի հայտ եկած հանգամանքների հիմքով։ Պաշտպանության կողմը կասկածներ ունի՝ դատավորի անկողմնակալության հարցում։
«Երկու նիստերը ցույց տվեցին, որ վստահության պաշարը սպառված է»,- ասաց պաշտպան Ռուբեն Մելիքյանը։

Մելիքյանի դիտարկմամբ, նախագահող դատավորը կոնկետ նպատակադրմամբ անտեսել է Քրեական դատավարության օրենսգրքով նախատեսված մի շարք պահանջներ․ նախագահող դատավորը շարունակել է նիստը՝ մեղադրյալներից մեկի բացակայությամբ այն դեպքում, երբ այդ հարցը բարձրացվել էր, կողմերի քննարկման առարկա չի դարձրել տուժողների երկու ներկայացուցիչների բացակայությամբ նիստը շարունակելու հնարավորությանը հարցը։

«Ես հեռու եմ այն մտքից, որ այս խախտումներն օրենքի չիմացության կամ անփութության հետևանք էր։ Միակ ողջամիտ բացատրությունն այն էր, որ դատավորը շտապում էր խափանման միջոցի վերաբերյալ որոշում կայացնելու՝ միակ կալանավորված անձի՝ մեր վստահորդ Արմեն Աշոտյանի նկատմամբ։ Այլ կերպ՝ դատարանը շտապում էր հայտարարել, որ Արմեն Աշոտյանը պետք է ևս երեք ամիս մնա կալանքի տակ»,-նշեց Մելիքյանը՝ հավելելով, որ հոկտեմբերի 9-ի և 11-ի նիստերին դատավորը, լուծելով պաշտպանության կողմի միջնորդությունները, գրեթե բոլոր դեպքերում տվել է հարցեր, որոնք ունեցել են ոչ թե ճշգրտող կամ պարզաբանող բնույթ, այլ՝ իրենից ներկայացրել է քողարկված դիրքորոշում, անգամ՝ որոշում կայացնելու։

Մելիքյանը նշեց, որ մեղադրանքի կողմի պաշտոնական ներկայացուցիչներն անգործության էին մատնված ամբողջ քննարկման ընթացքում, մեղադրողների գործառույթն ամբողջությամբ իրականացնում էր մեկ այլ սուբյեկտ։

«Բացի այդ, դատավորը չի դիտարկել մեր կողմից ներկայացված երկու երաշխավորագրեր՝ այն հիմքով, որ դատավորը չի ճանաչում Կոլումբիայի նախկին նախագահին և ԵԱՀԿ ԽՎ նախկին նախագահին, մինչդեռ, օրենքը ամենևին պարտադիր չի համարում, որ երաշխավոր դառնալու ցանկություն ունեցող անձանց դատավորը անձնապես կամ հանրորեն ճանաչի»,- նշեց Մելիքյանը։

Պաշտպանության կողմը միացավ միջնորդությանը։ Փաստաբան Տիգրան Աթանեսյանն էլ նշեց, որ կասկածի տակ է դնում դատավորի մասնագիտական ունակությունները։ Նման գնահատականի հիմքը, ըստ փաստաբանի, դատական ակտում տեղ գտած ձևակերպումներն են։
Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո