Փաստ ինֆո

Ի՞նչ է նշանակում գործընկեր, որտե՞ղ է Արցախի իշխանությունն ընդհանրապես, ուր է Արցախը։ Արցախի իշխանություն կարող է լինել միայն Արցախում, այլ երկրում՝ մեկ այլ տարածքային սուբյեկտի իշխանություն չի կարող գործել։ Այդ «վտարանդի կառավարությունը», նման բան չի եղել, նման բան եղել է դարասկզբին, երբ ռուսական ցարական իշխանությունն ամեն տեղ մի ցար ուներ։ Նման բան չի կարող լինել։ Այս մասին լրագրողների հետ զրույցում ասաց ԱԺ «ՔՊ»-ական պատգամավոր Արմեն Խաչատրյանը՝ արձագանքելով հարցին, թե ինչ է լինելու, ՀՀ իշխանությունները Արցախի իշխանությունների համար շարունակելու է գործընկեր մնալ։

Դիտարկմանը, որ ՀՀ իշխանությունները՝ ի դեմս «ՔՊ»-ի, ճանաչել է Արցախն Ադրբեջանի կազմում, ինչի արդյունքում այժմ Արցախը հայաթափվել է, Արցախի իշխանություններն էլ՝ ՀՀ-ում են, Խաչատրյանն արձագանքեց՝ նշելով, որ Արցախն Ադրբեջանի կազմում ճանաչումը միջազգային ընդունված իրավական փաստ է և որևէ մեկը չի կարող ասել՝ «այսպես չէ կամ այնպես չէ», ընդունված սահմանները մնում են, բայց դա չի նշանակում, որ դրանով պետք է վտանգվեր Արցախի ժողովրդի իրավունքները։

Անդրադառնալով Արցախի նախագահ Սամվել Շահրամանյանի հայտարարությանը, որի համաձայն՝ ՀՀ իշխանությունը տեղյակ է եղել, թե ինքն ինչ փաստաթուղթ է ստորագրում՝ կապված Արցախի Հանրապետությունը լուծարելու հետ, Խաչատրյանը նշեց․ «Ո՞նց կարող է Հայաստանը հանդուժել, որ փաստաթղթում կետ մտցվի, որը հետագայում Հայաստանի գլխին կախված վտանգ է լինելու։ Շահրամանյանը շատ բան կարող է ասել, ես չեմ ուզում մեկնաբանել, չեմ էլ լսել՝ ինչ է ասել, բայց Հայաստանը չի կարող տեղյակ լինել եւ հանդուրժել այն կետը, որը վնաս է Հայաստանին: Խոսքն այն կետի մասին է, որ փաստում է, թե իբր ՀՀ զինված ուժերը ներկա են եղել նաեւ Արցախում»։

Աղբյուր` Փաստինֆո