Փաստ ինֆո

Գեղարքունիքի մարզի ընդհանուր իրավասության դատարանի «Սևանի» նստավայրում՝ դատավոր Վարդան Հարությունյանի նախագահությամբ, այսօր շարունակվել է Ազատ գյուղի տարածքում տեղակայված զինվորական կացարանում 15 զինծառայողի կյանք խլած ողբերգական հրդեհի գործով դատավարությունը։

Ինչպես նախորդ, այնպես էլ՝ այսօրվա նիստն անցել է բավականին լարված մթնոլորտում. Նիստի մեկնարկին տուժողների իրավահաջորդներից մեկը մոտեցել է մեղադրյալ Եղիշե Հակոբյանին և հարվածել նրան, բացի այդ, նրա ուղղությամբ ջրի շիշ է նետվել։

Ավելի վաղ դատարանն արդեն քննել և անփոփոխ է թողել մեղադրյալների նկատմամբ ընտրված խափանման միջոցները։ Մասնավորապես, երկարացվել են Եղիշե Հակոբյանի, Գոռ Աղեկյանի, Մառլեն Սարգսյանի նկատմամբ ընտրված խափանման միջոց կալանավորման ժամկետը։ Այսօրվա նիստին, մինչ ապացույցների հետազոտմանն անցնելը, Մառլեն Սարգսյանի պաշտպանը հայտարարությամբ հանդես եկավ՝ նշելով, որ մինչ ապացույցների հետազոտման ավարտն իր պաշտպանյալն արդեն իսկ կկրկի իր պատիժը։ Վերջինս կալանքի տակ է այն պատճառով, որ, ըստ դատարանի, Սարգսյանը, գտնվելով ազատության մեջ, կարող է ազդեցություն ունենալ դատավարության մասնակիցների նկատմամբ, ըստ այդմ, պաշտպանը խնդրեց առաջնային հարցաքննել այն անձանց, վկաներին, որոնց նկատմամբ ենթադրաբար կարող է ազդեցություն ունենալ իր պաշտպանյալը։ Նույնանման դիրքորոշում հայտնեց նաև Գոռ Աղեկյանի պաշտպան ժորա Համբարձումյանը՝ բարձրացնելով, որ չի հստակեցվել, թե կոնկրետ ում նկատմամբ պետք է ազդեցություն ունենա իր պաշտպանյալը, ստացվում է՝ ոչ իրավաչափ կերպով է իր պաշտպանյալը կալանքի տակ, ըստ այդմ, եթե կան անձինք, որոնց նկատմամբ կարող է ազդեցություն ունենալ իր պաշտպանյալը, պետք է հարցաքննվեն ապացույցների հետազոտման սկզբում։

Այդուհանդերձ, նախագահողը նշեց, որ ապացույցների հետազոտումը կիրականացվի սահմանված կարգով, ինչից հետո մեղադրանքի կողմը հրապարակեց գործում առկա գրավոր ապացույցները։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Լուսանկարը՝ Ազատության տեսանյութից

Աղբյուր` Փաստինֆո