Փաստ ինֆո

Աշխարհում կգտնվի՞ մեկ այլ պետություն, որ իր Ազգային Ժողովում հայկական զենքի մասին տեղեկատվություն կտա ի լուր աշխարհի և հատկապես՝ ի լուր թշնամական պետությունների։ Այսինքն, մոտավորապես այս մոտիվով, թե՝ իմացեք, որքան էլ որ ահաբեկչական պետություն ադրբեջանի զինուժը ստուգել և զինաթափել է Արցախի հայկական Հանրապետության ժողովրդին, այնուհանդերձ, 21-րդ դարում ադրբեջանի իրականացված տեղահանության /որը ցեղասպանական գործողություն է համարվում/ արդյունքում անգամ, եղել են դեպքեր, որ արցախցիներն իրենց հետ բերել են իրենց զենքը։

Կենտրոնանանք փաստերի և երևույթների վրա։

Օրինակ, ի՞նչ կարիք կա նման դեպքերի մասին վերին ամբիոններից հայտարարություններ անելու։ Մանավանդ, հիմնականում օրինական զենք ունեցողներն են, որ բերել են իբրև նվեր՝ իրենց ստացած զենքը։ Ի վերջո, ցանկացած պարագայում՝ դա պետության խնդիրն է և բնավ ոչ՝ հայտարարությունների ժամի հարցուպատասխանի թեմա։

Որպես պետություն ՀՀ ՆԳՆ-ն թո՛ղ իր գործողություններն իրականացնի, ի՞նչ կարիք կա հայտարարել, թե՝ «իրոք ունենք տեղեկություններ, որ ԼՂ-ից /պաշտոնյան նկատի ունի՝ Արցախի Հանրապետությունը/ զենք-զինամթերք է մուտք գործել Հայաստան. մի քանիսը հանձնել են»։

Վերջապես, հիբրիդային պատերազմի մեջ գտնվող պետություն ենք, ու՞մ եք այդ կերպ մեսիջ փոխանցում։ Ակնհայտ է, որ հարց տվողի և հարցին պատասխանողի միջև կանգնած է հերթական անգամ «կիրթ» եղբորը ծառայություն մատուցելու ոմանց ցանկությունը, որ ոչ այլ ինչ է, քան՝ Հայաստանում ադրբեջանի քաղաքականության իրականացում։ (Ի դեպ, Ադրբեջանը շատ արագ օգտվեց այդ ծառայությունից ու երեկ արդեն թշնամու երկրի ԶԼՄ-ները տարածում էին, թե Հայաստանը կոչ է անում արցախցիներին զինաթափվել... )

Ճիշտ այնպես, ինչպես ականապատ տարածքների քարտեզները նվեր տրվեց ադրբեջանին՝ փոխարենը նույնիսկ մեկ ռազմագերի չփոխանակելով։

Իսկ միգուցե՞ այս կերպ քպական վերնախավը սեփական վախե՞րն է փորձում կառավարելի դարձնել։

Ցավալի է, սակայն պետության գործառույթներին ուղղակիորեն ներսից հարվածներ հասցնելու՝ նվաստացման այս պատմությունները քանի գնում շատանում են։

Աղբյուր` Փաստինֆո