Փաստ ինֆո

Ես մշտապես ձգտել եմ և սա էլ շատ լավ հնարավորություն է՝ իմ բոլոր գիտելիքները, դասախոսական փորձը, իրավունքի փիլիսոփայությունը, որը շատ կարևոր է իրավունքի բարձր դատարաններում, հատկապես՝ Վճռաբեկ դատարանում, ներդնելու նախադեպային իրավունքում։ Այս մասին ԱԺ-ում հայտարարեց Վճռաբեկ դատարանի քրեական պալատի դատավորի թեկնածու, ԲԴԽ անդամ Դավիթ Խաչատուրյանը։

Մասնավորապես, ԱԺ պատգամավոր Սոնա Ղազարյանը, հարց ուղղելով Խաչատուրյանին, հիշեցրեց, որ 2021թ․ ԱԺ-ն Խաչատուրյանին «գործուղել» է ԲԴԽ, կա տեսակետ, որ մինչ ժամկետի ավարտը պաշտոնյային այլ տեղ գործուղելը ճիշտ չէ, ուստի, Ղազարյանը հետաքրքրվեց՝ որն է մոտիվացիան տեղափոխվելու Վճռաբեկ դատարան՝ մինչև ԲԴԽ անդամի պաշտոնավարման ժամկետի ավարտը։

Պատասխանելով հարցադրմանը Խաչատուրյանը նշեց, որ ԲԴԽ-ում աշխատանքի իր ամենասիրելի հատվածը եղել է ԲԴԽ որոշումների վրա աշխատելը, որտեղ կարողացել են հստակ տարանջատում մտցնել՝ դատական վերահսկողության, դատախազական հսկողության և այլն։ Ղազարյանն էլ արձագանքեց՝ չի վիճարկել գիտելիքները, ցանկությունները, հմտությունները, բայց 2021թ․ Խաչատուրյանը կրկին շատ տպավորիչ ներկայացրել է հմտությունները, որը պետք կգան ԲԴԽ-ում։

«Որը պետք է լինի պատգամավորի մոտիվացիան՝ Ձեզ քվեարկելու այն դեպքում, եթե Դուք ավարտին չեք հասցրել 5 տարի ժամկետով Ձեր գործառություները ԲԴԽ-ում իրացնելու Ձեր պարտականությունը»,- նշեց ՔՊ-ական պատգամավորը, ինչին ի պատասխան Դավիթ Խաչատուրյանն արձանագրեց, որ Վճռաբեկ դատարանում գիտելիքներն իրացնելու ավելի մեծ դաշտ կա։

Աղբյուր` Փաստինֆո