Փաստ ինֆո

ՀՀ Ազգային ժողովի հերթական քառօրյայի օրակարգում է ՔՊ-ական պատգամավոր Սիսակ Գաբրիելյանի հեղինակած «Տեսալսողական մեդիայի մասին» Հայաստանի Հանրապետության օրենքում լրացումներ կատարելու մասին նախագիծը

Գաբրիելյանը ներկայացնելով նախագիծն ասաց, որ դրանով փորձ է արվում պաշտպանել հեռուստաընկերությունների ֆինանսական հոսքերը։

«Եթե ավելի պարզ՝ տարիներ շարունակ գործել է համակարգ, ըստ որի՝ ֆինանսական բաշխումները տեղի է ունեցել մեկ կազմակերխության կողմից, այսինքն, գործել է մի կազմակերպություն, որը պետք է ռեյտինգներ տար հեռուստաընկերություններին, բայց այդ ռեյտինգները տվել են կոնկրետ հեռուստաընկերություններին և, օրինակ, միջազգային ընկերությունները՝ հաշվի առնելով այդ կազմակերպության տված չափիչ տվյալները, գովազդ տվել են կոնկրետ հեռուստաընկերությունների։

Այս նախագծով առաջարկվում է, որ հեռուստաընկերությունները պետք է միանան, ընտրեն խորհուրդ, այդ խորհուրդը պետք է ընտրի այն կազմակերպությանը, որը չափումներ կիրականացնի և նաև իրենք վերահսկողություն կունենան այդ չափիչ ընկերության նկատմամբ։

Այն հեռուստաընկերությունները, որ չեն ուզենա, որ իրենց մասով չափումներ իրականացվեն՝ տվյալ հեռուստաընկերության տվյալները չեն հրապարակվի։

Այդ տվյալները պարտադիր պետք է տրամադրվեն ՀՌԱՀ-ին՝ հաշվի առելով այն հանգամանքը, որ նաև հանձնաժողովը ունի որոշակի գործառույթներ՝ գովազդի վերահսկման»։

Գաբրիելյանի դիտարկմամբ՝ սա պաշտպանում է ինչպես հեռուստաընկերություններին, այնպես էլ գովազգատուներին։

«Միջազգային աուդիտը պարզել էր, որ գործող ընկիերության իրականացրած չափիչ գործընթացը չի համապատասխանում իրականությանը, հետևաբար գովազդատուների գումարները անարդարացի են բաշխվել, իսկ հեռուստաընկերությունների մասով՝ կարածում եմ, իրենք շատ լավ հասկանում են, թե որ հեռուստաընկերություններ են հոսել գումարները և որոնք են տուժել գործող չափիչ համակարգի գործունեության արդյունքում»։

Ի պատասխան ՔՊ-ական պատգամավոր Արթուր Հովհաննիսյանի հարցին, թե արդյոք շուկան մոնոպալիզացվել ու կառավարվել է ըստ քաղաքական նախընտրության՝ Սիսակ Գաբրիելյանը պատասխանեց, որ այո, հենց այդպես էլ եղել է.

«Կոալիցիայի մեջ ենք եղել Դաշնակցության հետ՝ «Երկիր մեդիայի» ռեյտինգը մի քիչ կբարձրացնենք, գովազդից փող կգա, չեն եղել կոալիցիայի մեջ՝ չեն բարձրացրել, նույնը օրինակ, «Կենտրոնի» դեպքում, պետք չէ այդ ՀԸ-ն ունենա ռեյտինգ՝ չի ունենա, ռեյտինգ չի ունենա՝ գովազդ չի գա ու ֆինանսական աղբյուրներից կզրկվի։ Այսինքն, անարդարացի են բաշխվել գումարները, այսինքն, այս նախագծով ֆիքսելու ենք, որ պետությունը զրո մասնակցություն ունի։ Անգամ նախագծի սկզբնական փուլում կար, որ ՀՌԱՀ-ը մասնակցություն պետք է ունենար, բայց հետո ասեցինք, որ ինքն անկախ մարմին է, այդտեղ պետք է չլինի։ Այսինքն, հեռուստաընկերություններն են ընտրում, թե որ ընկերությունն է իրականացնելու իրենց ռեյտինգների չափումները»։

Դիտարկմանը, թե ստացվում է, որ այդ չափիչ ընկերությունը տարիներ շարունակ մոլորեցրել է և ապօրինի ազդեցություն է ունեցել ՀԸ-ների քաղաքականությունների վրա, հետևաբար, իրավական առումով կա՞ որևէ բան անելու այդ ընկերությունների տնօրինության հետ՝ Գաբրիելյանը պատասխանեց, որ եթե ՀԸ-ները այդ աուդիտի հիման վրա չեն դիմել դատարան, իսկ ինքը տեղյակ է, որ չեն դիմել, ապա իրենք կարող են դիմել դատախազությանը, թող իրենք պարզեն՝ խախտում կա, թե ոչ։

Աղբյուր` Փաստինֆո