Փաստ ինֆո

Սեպտեմբերի 19-ին կեսօրին՝ ադրբեջանցիների հարձակումից րոպեներ անց Կարմիր Շուկայի բնակիչներն արդեն լցվել էին դպրոցի ապաստարան։ 2020թ․ պատերազմից հետո ադրբեջանցիներն անմիջապես գյուղի գլխավերևում էին դիրքավորված, ուստի հենց սկսել են ռմբակոծել, առաջնահերթ տարհանել են բնակչությանը։

«Չեմ կարող նկարագրել, թե ինչ էր կատարվում։ Բառերով դա ներկայացնել անհնար է։ Շատ բան չեմ հիշում, սարսափահար վազել ենք պարտեզ, երեխային վերցրել ու հասցրել դպրոցի ապաստարան։

Քանի անգամ հրետակոծության տակ ենք ընկել։ Ով որ ուղղությամբ կարողացել՝ վազել է, որ փրկվի։ Միայն մեր ընտանիքը չորս-հինգ տեղ է փոխել․ սկզբում գնացել ենք Հերհեր, էնտեղից Ծովատեղ, հետո Խերխան, Կոլխոզաշեն․․․ Որտեղ գնում էինք, ռմբակոծում էին։ Տեղ-տեղ ոտքով, կուչ եկած էինք քայլում, տեղ-տեղ մեքենայով առաջանում։ Մեքենայի վրա կրակում էին, դրա համար ստիպված էինք երեխեքին գրկել ու ծառերի տակով, թաքուն-թաքուն քայլել․․․ Մի ահավոր վիճակ էր, հազիվ փրկվել ենք, հրաշքով․․․»,- «Փաստինֆո»-ին պատմում է Կարմիր Շուկայից բռնի տեղահանված Աննան՝ սարսափ ֆիլմը շատ մեղմ համարելով իր տեսածի ու ապրածի համեմատ։

Բնակիչների մի մասն անտառներով է դուրս եկել գյուղից․ զրուցակիցս նշում է՝ ամուսինը չի թողել, որ իրենք էլ անտառով գնան․ վախենում էր, որ ադրբեջանցիներն արդեն անտառները լցված լինեն։

Սթրեսը դեռ չեն հաղթահարել ու դժվար էլ մի օր հաղթահարեն։ Ասում է՝ շատ բան չեմ հիշում՝ հատկապես ամսաթվերը, բայց հիշում է, որ Կոլխոզաշենից հետո Գիշի են գնացել, այնտեղ երկար սպասել են, մինչև Ստեփանակերտ կկարողանան հասնել։ Հարազատների մի մասի հետ կապ չկար։ Ամուսնու եղբայրն ու քրոջ ամուսինը դիրքերում էին ու երկար ժամանակ լուր չունեին նրանցից։

Սեպտեմբերի 27-ին նրանց ընտանիքն ու ամուսնու քույրերը՝ իրենց ընտանիքներով դուրս են եկել Ստեփանակերտից․ կես ճանապարհին՝ հաջորդ օրը, կիսուրն է մահացել։ Ասում է՝ ոչ մի գանգատ չի ունեցել․ հանկարծամահ է եղել։ Դժոխքի միջով անցնելուց, հայրենազրկվելուց հետո բազմաթիվ մարդկանց սիրտ, ուղղակի, չի դիմացել․․․

Նրանք հիմա գերդաստանով՝ չորս ընտանիքով, տուն են վարձակալել։ Ասում է՝ տան վարձերը շատ բարձր են, դրա համար միասին են ապրում, որ կարողանան վարձը տալ։ 13 հոգով, որից 6-ը երեխա, մեկ հարկի տակ են հավաքվել․․․

Աղբյուր` Փաստինֆո