Փաստ ինֆո

«Փաստինֆոն» ահազանգեր է ստանում Արցախից բռնի տեղահանվածներից առ այն, որ իրենց՝ ժամկետը լրացած վարորդական իրավունքի վկայականները Հայաստանի իրավասու մարմինները հրաժարվում են փոխարինել կամ ժամկետը երկարացնել։

Բռնի տեղահանված Արսենի վարորդական իրավունքի ժամկետը լրացել է հոկտեմբերի 7-ին։

«Գնացի ԳԱԻ, դիմեցի, որ երկարացնեն, ասեցին, թե հիմա ինչ-որ խնդիր կա, 4 օրից մոտենանք։ 10 օրից նորից գնացի, ասեցին, դեռ խնդիրը լուծված չի։ Իրենց ասում եմ՝ օրական մինչև ժամը 3-4-ը ձեզ այդ հարցով երևի մոտ 300 մարդ դիմում է, ինչո՞ւ լուծում չեք տալիս, ասում են ինչ-որ մարմին է ստեղծվելու, որը խնդրին լուծում կտա։ Արդեն 20 օրից ավելի է ոչ մի տեղաշարժ չկա։ Ոչ մի մարմին էդպես էլ չի ստեղծվել ու ոչինչ էլ չեն արել»,- «Փաստինֆո»-ին պատմել է Արսենը։

Նա տարակուսած է, վարորդական իրավունքն իրեն շատ է անհրաժեշտ ու իր մտահոգությունների մասին ասել է նաեւ ճանապարհային ոստիկանությունում. «Ասացի, բա որ պարեկը կանգնացնի՝ ինչ անեմ, ասում են, եթե բարի պարեկ լինի, մարդկային լինի՝ ձեր իրավիճակի մեջ կմտնի՝ չի տուգանի։ Ասում եմ՝ ձեր ասածին հավատո՞ւմ եք, ասում են՝ չգտենք ինչ անել»։
Արսենը պատմեց, որ խնդիրը բոլոր արցախցիներին է վերաբերում, թեև ինքը վարորդական իրավունքն ստացել է Սևանում, բայց անգամ այդ պարագայում՝ հրաժարվում են այն փոխարինել։

«Ասում եմ՝ ես հաշվառված եմ Սևանում, սրանո՞ւմ է խնդիրը, գնա՞մ Սևան, մի քանի պատուհան այն կողմ աղջիկ էր նստած, ինչ ասում էինք՝ ճպացնում էր, ասաց՝ նշանակություն չունի, որտեղ եք վարորդական իրավունք ստացել, Ձեր գրանցումը Ղարաբաղի է, իսկ Ղարաբաղ էլ չկա։
Ինձ խորհուրդ տվեցին Հայաստանի գրանցում ստանալ, ես էլ գնացի անձնագրային բաժին, ուզում էի գրանցումս փոխել, բայց էնտեղ էլ պատասխանեցին, որ հրաման է տված. «արցախցիների գրանցումը հլը որ չեն փոխում»։
Փորձեցի նաև մեքենայի համարները փոխել, այդ գործարքն էլ հրաժարվեցին անել, ասում եմ, եթե տեղահանված եմ ու ուզում եմ մի մեքենա վերցնել՝ տաքսի քշել, որ ընտանիքս պահեմ, դա՞ էլ չեմ կարող անել, ասում են՝ ոչ»։

Արսենն ասաց որ մեքենան իր համար հիմա անհրաժեշտություն է, քանի որ Երևանում բնակարան վարձել չի կարողացել, ստիպված էր մայրաքաղաքից դուրս բանակարան գտնել, սակայն մայրը վատառողջ է ու պարբերաբար Երևան բերելու անհրաժեշտություն կա, որպեսզի բժիշկների հսկողության տակ լինի։

«Փաստինֆոն» խնդրի առնչությամբ պարզաբանում խնդրեց նաև ՀՀ ՆԳՆ ոստիկանությունից, մեզ առաջարկեցին՝ գրավոր հարցում ուղարկել։

Աղբյուր` Փաստինֆո