Փաստ ինֆո

Կարծում եմ՝ շատերն են հիշում Հայաստանի ժողովրդի ծնելիության նվազման համատեքստում՝ դեռևս 2019-ին Փաշինյանի՝ ՀՀ բնակչությունը 5 միլիոնի հասցնելու խոստումը։ Ընդ որում, Ստեփանակերտում բոցաշունչ ելույթ ունենալով նա 2050 թվականն էր նախանշում․․․

Հարց է ծագում՝ համադրելի՞ է հիշյալ 5 միլիոնը ՀՀ-ում իրականացված վերջին մարդահամարի արդյունքներին և ընդհանրապես, ի՞նչ միջոցով էր պատրաստվում վերջինս ժողովրդագրական աճող արդյունք ունենալ։ Թե՞ ինչպես բոլոր դեպքերում՝ թիվ էր, ասեց։ Բայց սպասեք, երբ ասվում է՝ ՀՀ բնակչությունը, էթնիկ կազմը բնավ չի կարևորվում նրա համար։ Դե իհարկե․․․

2 մլն 932 հազար 731 մարդ` այս թիվն է արձանագրվել 2022 թվականին Հայաստանում անցկացված մարդահամարի նախնական արդյունքներով։ Պատկերն, իրոք, մտահոգիչ է։ Մտահոգիչ է և՛ գլոբալ, և՛ լոկալ առումով, քանի որ հեռացողների զգալի մասը սահմանամերձ բնակավայրերի բնակիչներն են։ Իսկ նրանց տեղը ՝ որպես կանոն՝ դատարկ չի մնում։ Քանզի Հայաստանի սահմանին այսօր ցավ ի սիրտ ասած՝ Արցախի փոխարեն հայի հայրենիքը զավթած թշնամի պետությունն է։

Որի հետ ներկա իշխանության տևական խաղաղության մասին երազանքը՝ ավելի շուտ գույժ է, պատերազմի գուժկան և պատերազմ։
Նախնական արդյունքների համաձայն՝ 2011թ․մարդահամարի համեմատությամբ առկա բնակչության թվաքանակի ցուցանիշը՝ ըստ հաշվառման պահի նվազել է 182 333 մարդով, իսկ մշտական բնակչությանը՝ 86 123 մարդով։
Ընդ որում, գյուղական բնակչությունը նվազել է 46 748 մարդով։ Ի մասնավորի՝ 2011-2022թթ ընթացքում Գեղարքունիքի մարզի բնակչությունը նվազել է մոտ 25 հազարով, որից 19 հազարը՝ գյուղական համայնքներից, իսկ Սյունիքի մարզի բնակչությունը նվազել է 27 հազարով։

Ի դեպ, հեռու չէ այն ժամանակը, որ Արցախից 100 հազար և ավելի հայության վերջին տեղահանության հետոյական հետևանք որպես արձանագրելու ենք, որ նրանց մի հատվածը նույնպես բռնել է տարագրության ճանապարհը։ Հո իզու՞ր չեն Արցախի ներկայացուցչության մոտ 44-օրյայի հետպատերազմական օրերի հանգույն սցենարները։ Սցենարիստները եռյակ կազմած են զբոսանքի ելնում։
ՀՀ-ից հայության արտագաղթի նոր ալիք է սկսվել, իսկ ներկա իշխանությունը եկած օրից լծվել է մեր մոնոէթնիկության ջարդման գործընթացին։ Բնականաբար, հիշում ենք, որ Եվրոպայի պարտադրանքներից էր նաև փախստականների որոշակի հոսքերը Հայաստան ուղղելը։ Եվ, թերևս, նրանցով էր նաև գոյանալու փաշինյանական 5 միլիոնը։

Սակայն այսօր առավել վտանգավոր միտումներ կան և առաջին հերթին՝ ազարբայջան սարքովի պետության «փախստականների վերադարձ» օպերացիան է, որի միջոցով թշնամական երկիրը նպատակ ունի խաղաղ եղանակով իրականացնել իր նվաճողական քաղաքականությունը։ Իհարկե, խաղաղ եղանակը նրանցից հեռու է, իսկ ազգամիջյան կոնֆլիկտներ հրահրելը՝ մոտ․․․
Մերոնք երկրից գնում են, իսկ օտարները՝ գալիս են։ Ասել է՝ ժողովրդագրական պատկերի փոփոխությունը միայն արտագաղթով չի պայմանավորվելու, այլ բնակչության էթնիկ կազմի փոփոխությամբ։ Արդեն իսկ մենք տեսնում ենք, որ սպասարկման ոլորտում որքան են շատացել օտարերկրացիները, այդ թվում նաև՝ մուսուլման ․․․

Ի դեպ, հարևան թշնամի պետությունների քաղաքացիների՝ ՀՀ-ում անշարժ գույքի ձեռքբերման փաստերը , իսկ ավելի հաճախ՝ թաքցված տվյալները ևս ժողովրդագրական պատկերի փոփոխության մասին փաստող երևույթ են։

Բնականաբար, բոլոր այս թեմաները և դրանցով պայմանավորված հարցերը մեզ առաջին հերթին անհանգստացնում են մեր պետության և հայության խնդիրների, մեր սահմանների պաշտպանության և ազգային անվտանգության համատեքստում, առավել ևս, որ այսօր, երբ հայաթափված է Արցախը, ազգովի փխրուն վիճակում ենք հայտնվել՝ փաստացի պատերազմներով, տեղահանություններով, ըստ էության՝ ցեղասպանությամբ և դեռ նոր պատերազմի սպառնալիքներով /ընդ որում, օրեր են նշում/ ապրող տարածաշրջանում:

Ա․ Ե․

Աղբյուր` Փաստինֆո