Փաստ ինֆո

«Հաղթանակ» զբոսայգում գործող սրճարաններից մեկում տեղի ունեցած պայթյունի առաջացման պատճառեները դեռևս չեն պարզվել, քննության առարկա են հնարավոր բոլոր վարկածները։ Այս մասին «Փաստինֆո»-ի հետ զրույցում հայտնեցին ՀՀ Քննչական կոմիտեից։

Հիշեցնենք, որ դեպքը տեղի է ունեցել հոկտեմբերի 21-ին՝ «Հաղթանակ» զբոսայգու կիսաբացօթյա սրճարաններից մեկում։ Պայթյունի հետևանքով երեք քաղաքացի էր տուժել։ Տարածքը գազաֆիկացված չէ, ինչն էլ թույլ է տալիս ենթադրել, որ պայթյունը գազից չի առաջացել:
ՀՀ ՔԿ նախագահի մամուլի քարտուղար Գոռ Աբրահամյանը «Փաստինֆո»-ի հետ զրույցում հայտնեց, որ դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 412-րդ հոդվածի հատկանիշներով, այն է՝ անվտանգության պահանջներին չհամապատասխանող հումքերի կամ ապրանքների շրջանառությունը, աշխատանքների կատարումը կամ ծառայությունների մատուցումը։

«Կատարվում է քննություն՝ պարզելու պայթյունի առաջացման պատճառները, այսինքն պատճառը դեռևս պարզված չէ։ Քննության առարկա են հնարավոր բոլոր վարկածները։ Քննությաննը հետաքրքրող հարցերի պատասխաններն ստանալու համար նշանակվում են դատաբժշկական, ինչպես նաև դատապայթյունատեխնիկական և դատաապրանքագիտական համալիր փորձաքննություններ»,- ասաց Աբրահամյանը։

Նրա խոսքով՝ պայթյունից այս պահի դրությամբ, տուժածների թիվը 3-ն է, նրանցից երկուսը դուրս է գրվել հիվանդանոցից, մեկը դեռևս գտնվում է վերակենդանացման բաժնում։

«Վերջինիս հետ դեռևս հնարավոր չի եղել անհրաժեշտ քննչական գործողություններ կատարել՝ առողջական վիճակի պատճառով»,- նշեց նա՝ հավելելով, որ նախաքննությունը շարունակվում է։

Հեղինակ՝ Իզաբել Սահակյան

Աղբյուր` Փաստինֆո