Փաստ ինֆո

Աշխարհաքաղաքական առկա իրողությունների պայմաններում, կարծում եմ, ցանկացած երկրի հետ, որը պետենցիալ ունի մեզ այս կամ այն քանակությամբ զենք կամ զինամթերք մատակարարելու կամ ծառայություն մատուցելու, պետք է համագործակցենք ու փորձենք մեծացնել մեր պաշտպանական ունակությունները։ Այս մասին «Փաստինֆոյի» հետ զրույցում ասաց ռազմական փարձագետ Վիտալի Մանգասարյանը՝ անդրադառնալով Ֆրանսիայի զինված ուժերի նախարարության հետ այսօր երկկողմ համագործակցության մասին փաստաթղթերի ստորագրմանը։

«Այլ հարց է, թե Ֆրանսիան այս փուլում ինչ շահագրգռվածություն ունի, որ հենց հիմա է ուզում իրականացնել այդ համագործակցությունը։ Իմ կարծիքով, այստեղ քաղաքական կոմպոնենտ էլ կա ու միգուցե դոմինանտ է հենց այդ կոմպոնենտը։ Ֆրանսիան փորձում է քաղաքական իր խնդիրները լուծել և իր դիրքերը որոշակի ամրապնդել մեր տարածաշրջանում։ Այսինքն, աշխարհաքաղաքական փոթորիկի մեջ գուցե Ֆրանսիան որոշում է կայացրել իր դիրքերն ամրապնդել մեր տարածաշրջանում, իսկ դրա ճանապարհներից մեկը կարող է հանդիսանալ զենքի առևտուրը, ինչը մեր համար ևս այս փուլում կարևոր է»,- ասել է փորձագետն՝ ավելացնելով, որ ամեն դեպքում՝ մեր պաշտպանության բաձրացմանը նպաստող հնարավորությունը չպետք է բաց թողնենք։

Դիտարկմանը, թե ինչպես կարելի է ընկալել այս համագործակցությունը, հաշվի առնելով նաև այն, որ Ֆրանսիան նաև Ադրբեջանին է զենք վաճառում՝ փորձագետը նկատեց, որ 44 –օրյա պատերազմից մի քանի տարի առաջ ստորագրվել էր ադրբեջանա-ֆրասիական համագործակցության մասին փաստաթուղթ, որով մի քանի արբանյակներ էին երկրի ուղեծիր բաց թողնվել։

«Սա բնականաբար մեծ ազդեցություն է ունեցել ադրբեջանական կողմի տարած հաղթանակի վրա։ Դրանք 2-3 արբանյակներին էին, որոնք հենց ռազմական նշանակություն ունեցող արբանյակներ էին։ Դրանք հետախուզության և կայուն կապի ստեղծման համար աշխատող արբանյակներ են եղել»,- նշել է Մանգարյանը։

Ըստ նրա՝ այս համագործակցությունը պետք է դիտարկել այն տեսանկյունից, որ այդ փուլում այդ համագործակցությունն է բխել Ֆրասիայի շահերից։ Ի վերջո, հենց Ֆրանսիան է որոշում, թե որ փուլում, որ երկրին զենք կվաճառի։

Հարցին, թե որքանով այս համագործակցությունը կարելի է որպես ՀԱՊԿ-ին կամ ՌԴ-ին այլընտրանք ընկալել՝ փորձագետը ճիշտ չհամարեց նման կանխավարկածով առաջնորդվելը, որ եթե ունենք ֆրանսիայի հետ համագործակցություն, ուրեմն պետք է ՀԱՊԿ-ի հետ համագործակցությունը չեղարկենք կամ հրաժարվենք։ «Մենք պետք է կարողանանք «և,և»-ի քաղաքականությունը կյանքի կոչել։ Ոչ թե որոշում կայացնենք, որ եթե ՀԱՊԿ-ը չի, ապա Ֆրանսիան է, և հակառակը։ Կարծում եմ, այդ մոտեցումը լավ տեղ չի տանելու»,- արձանագրել է Վիտալի Մանգասարյանը։

Աղբյուր` Փաստինֆո