Փաստ ինֆո

Իրավապահ համակարգում կազուսային իրավիճակ է ստեղծվել: Գործող իշխանությունների կողմից Արցախն Ադրբեջանի կազմում ճանաչելու հայտարարությունը իրավապահներին դրդում է առերեւույթ պաշտոնեական հանցագործության։

Այսպես՝ 2023 թվականի հոկտեմբերի 10-ին Քննչական կոմիտեն պաշտոնապես հայտարարեց, որ հոկտեմբերի 9-ին քրեական վարույթ է նախաձեռնվել «Արցախբանկ» ՓԲԸ-ի Մարտունու մասնաճյուղի ամբողջ գումարը՝ մոտ 60.000.000 ՀՀ դրամ և մոտ 100 պարկ գրավադրված ոսկյա զարդերը գողանալու դեպքի առթիվ։ Դեպքը տեղի է ունեցել Արցախի Հանրապետության Մարտունի քաղաքում։ Նախնական տվյալներով՝ գաղթելուց առաջ կառավարիչը մասնաճյուղի գումարն ու դրավադրված ոսկյա զարդերը տեղափոխել է իր մեքենա՝ հաջորդ օրը իր հետ Հայաստան բերելու համար,սակայն առավոտյան նկատել է, որ մեքենայի ապակին կոտրել են ու գողացել։

Արցախում տեղի ունեցածի առնչությամբ քրեական վարույթ է նախաձեռնվել Երեւանում՝ ՀՀ քրեական օրենսգրքի 254-րդ 3-րդ մասի 4-րդ կետի հատկանիշներով (առանձնապես խոշոր չափերով գողությունը) նախաձեռնվել է քրեական վարույթ։

Տվյալ պարագայում, իհարկե, կարեւորը ոչ թե հոդվածն է, այլ այն, որ այն նախաձեռնվել է ՀՀ քրեական օրենսգրքով ու ՀՀ քննչական մարմինների կողմից։ «Փաստինֆո»-ն գրավոր հարցմամբ դիմել էր ՀՀ ՔԿ-ին՝ պարզելու, թե ՀՀ քրեական դատավարության օրենսգրքի ո՞ր նորմով առաջնորդվելով է ՀՀ ՔԿ-ն քրեական վարույթ նախաձեռնել՝ Արցախում տեղի ունեցած առերեւույթ գողության առնչությամբ, արդյոք չեն կարծում, որ խախտվել է ընդդատությունը ՝ նկատի ունենալով, որ այսօրվա ՀՀ իշխանություններն՝ ի դեմս Նիկոլ Փաշինյանի՝ Արցախն Ադրբեջանի կազմում են ճանաչել: Հարցմամբ նաև հետաքրքրվել էնք, թե արդյո՞ք ՀՀ-ից քննչական խումբ կմեկնի Արցախ՝ դեպքի վայրում զննություն կատարելու համար:

Ժամկետի խախտմամբ ուղարկված գրությամբ ՀՀ ՔԿ-ն հայտնագործություն էր արել։ «Արցախբանկ» ՓԲԸ-ից կատարված առերևույթ հափշտակության դեպքի առթիվ քրեական վարույթը նախաձեռնվել և ՀՀ քննչական կոմիտեի քննչական ենթակայությամբ քննվում է քրեական իրավունքի և քրեական նորմերին համապատասխան՝ հիմք ընդունելով այն հանգամանքը, որ «Արցախբանկ» ՓԲԸ-ի կենտրոնական գրասենյակը գտնվում է Հայաստանի Հանրապետությունում, տվյալ քրեական վարույթի շրջանակներում տուժող է հանդիսանում «Արցախբանկ» ՓԲԸ-ն»,- նշել են ՔԿ-ից՝ հավելելով, որ դեպքի հանգամանքները վարույթի շրջանակներում համակողմանիորեն պարզելու նպատակով իրականացվում են անհրաժեշտ քննչական և վարութային գործողություններ:

Նկատենք, որ ՀՀ քրեական օրենսդրությունը նման ընթացակարգ չի նախատեսում ՔԿ-ի այս տրամաբանությամբ՝ ասենք՝ Փարիզում կամ Վաշինգտոնում ինչ-որ մեկը գողանում է ՀՀ քաղաքացի հանդիսացող զբոսաշրջիկի դրամապանակը ու այստեղ իրապահները պետք է քրեական վարույթ նախաձեռնեն, քանի որ տուժողը ՀՀ քաղաքացի է՞, եւ իրեն իրավունք է վերապահելու անհապաղ թռչել՝ դեպքի վայրի զննությա՞ն։ Վստահ ենք, որ քննչական կոմիտեում եւս գիտակցել են իրենց ուղարկված պատասխանի անհեթեթությունը ու թերեւս դրանով պայմանավորված էլ չեն վկայակոչել որեւէ կոնկրետ քրեական օրենսդրության որ հոդվածն են հիմք ընդունել։

ՀՀ տարածքից դուրս հանցանքների դեպքում վարույթ նախաձեռնելու ընթացակարգ ՀՀ քրեական օրենսգրքի 12-րդ հոդվածը նախատեսում է, բայց այնտեղ հնարավոր չէ գտնել գեթ մեկ ձեւակերպում՝ տուժողի բնակության վայրի կամ քաղաքացիության մասին։

Տվյալ պարագայում փաստ է, գործ ունենք ապօրինի հարուցված վարույթի հետ, հետեւապես բոլոր քննչական գործողություններն ապօրինի են, իսկ ձեռք բերված ապացույցներն՝ անթույլատրելի։

Նման ապօրինության պատճառը ունի անուն՝ Նիկոլ Փաշինյան, որը ՀՀ ազգային օրենսդրության հակասցող իր հայտարարություններով մի ամողջ իրավապահ ոլորտի մտցրել է փակուղի՝ դրդելով պաշտոնեական հանցագործության, ինչն էլ օգտագործում է իրեն անվերապահ ենթարկեցնելու համար. քանզի նույն այդ քննիչներն ու դատախազները, լինելով իրավաբան, գիտակցում են, որ երկրում սահմանադրական կարգը վերականգնվելու դեպքում բոլորը ստիպված են լինելու պատասխան տալ՝ իրենց առերեւույթ ապօրինի գործողությունների համար։

Աղբյուր` Փաստինֆո