Փաստ ինֆո

Տեսականորեն 3+3 ձևաչափը կարող է դառնալ այլընտրանքային հարթակ խաղաղության պայմանագրի շուրջ բանակցությունների համար։ Այս մասին «Փաստինֆոյի» հետ զրույցում ասաց քաղաքագետ Հրանտ Միքայելյանը՝ անդրադառնալով Թեհրանում վաղը կայանալիք «3+3» ձևաչափով արտգործնախարարների հանդիպմանը։

Նա ընդգծեց, որ իրականում «3+3»-ի տարբերությունը բոլոր եղած նախորդ ձևաչափերից այն է, որ այդտեղ Թուրքիան ներկա է և անմիջապես մասնակցելու է բանակցություններին։

«Սրան և՛ Թուրքիան, և՛ Ադրբեջանն էին ձգտում։ Ավելին, իմ տպավորությունն այն է, որ նաև ՀՀ ներկայիս իշխանությունները նույնպես ցանկում են նման ձևաչափով բանակցություն ունենալ։ Այնպես որ, բացառված չէ, որ բանակցությունները քիչ-քիչ անցնեն դեպի այս պլատֆորմ»։

Քաղաքագետի դիտարկմամբ՝ օբյեկտիվորեն, մեզ համար հիմա նպաստավոր հարթակ՝ խաղաղության բանակցությունների համար, չկա։
«Սա բացատրվում է առաջին հերթին մեր ադեկվատ դիրքորոշման բացակայությամբ, բացի այդ՝ նաև թուլությամբ։ Թուրքիան և Ադրբեջանը կարողացել են իրենց հակամարտությունները քիչ-քիչ լուծել տարածաշրջանում։
Բացի այդ՝ մենք մեր քաղաքականությամբ լուրջ խնդիրներ ենք ստեղծել Ռուսաստանի և Իրանի հետ, այսինքն, մենք չենք կարող այս ձևաչափում որևէ հայանպաստ որոշում ակնկալել կամ ավելին՝ ավելի քիչ ադրբեջանանպաստ ու ավելի քիչ հակահայկական որոշում ստանալ»։

Միքայելյանի դիտարկմամբ՝ առհասարակ խաղաղության պայմանագրի շուրջ քննարկումը նախևառաջ Ադրբեջանի օրակարգն է։ «Սա նրանց հարկավոր է լեգալիզացնելու իրենց բոլոր մարդասպանությունները և ոճրագործությունները։ Այդպիսով, այդտեղ չի կարող առհասարակ որևէ նպաստավոր բան տեղի ունենալ, բայց նաև այնպես չէ, որ կա մեկ այլ հարթակ, որն ավելի նպաստավոր է։ Այս պահին նպաստավոր հարթակ Հայաստանի համար պարզապես չկա»։

Հիշեցնենք՝ Թեհրանում վաղը նախատեսվում է 3+3 ձևաչափով արտգործնախարարների մակարդակով հանդիպումը: Բացի տարածաշրջանային հարցերից նախատեսվում է նաև Հայաստանի ու Ադրբեջանի միջև խաղաղության պայմանագրի շուրջ բանակցությունների քննարկում:
Նշենք, որ նախորդ հանդիպումներին Վրաստանը չի մասնակցել ու այն տեղի է ունեցել փաստացի 3+2 ֆորմատով

Աղբյուր` Փաստինֆո