Փաստ ինֆո

Արցախում կային ստեղծված պրոյեկտներ՝ դեռևս 2018 թ-ից, որոնք միշտ ամեն ինչ անում էին, որպեսզի քաղաքական և հասարակական կյանքն անընդհատ վայրիվերումների մեջ լինի, որպեսզի մարդիկ անընդհատ իրական խնդիրներից ու պրոբլեմներից ընկնեն մեկ այլ դաշտ, որտեղ կա և ծեծուջարդ և անվայել պահվածք, ինչը ո՛չ հային, ո՛չ առավել ևս արցախցուն այս իրավիճակում հարիր չէ։

Այս մասին «Փաստինֆոյի» հետ զրույցում ասաց Արցախի Հանրապետության Ազգային Ժողովի «Արդարություն» խմբակցության պատգամավոր Մետաքսե Հակոբյանն՝ անդրադառնալով հարցին, թե ում էր իրականում ձեռնատու այն, ինչ այսօր տեղի ունեցավ Երևանում Արցախի ներկայացուցչության մոտ, արդյոք կային բախումներ հրահրողներ, կազմակերպիչներ։

«Այդ պրոյեկտներն իրենց գործունեությունը, բնականաբար, չեն դադարեցրել, նրանք իրենց ծրագիրը չեն ավարտել, քանի որ ծրագիրը չի ավարտվում Արցախի հանձնմամբ, այն պետք է դեռ շարունակություն ունենա, սա այլևս ակնհայտ է։

Հիմա իրենք նորից ակտիվացել են, իսկ ավելի ստույգ՝ այստեղ հայտնվելու առաջին օրերից էլ ակտիվ են եղել։ Սա իրենց նույն ոճն է՝ սոցիալական ցանցերով անընդհատ իրավիճակը լարված պահել, իսկ մենք 2018թ-ին տեսանք, թե ինչպես կարելի է կառավարել ու մանիպուլացնել մարդկանց սոցիալական ցանցերով»,- նշել է պատգամավորը։

Ինչպես արդեն հայտնել ենք այսօր ակցիա է տեղի ունեցել Երեւանում Արցախի Հանրապետության ներկայացուցչության մոտ, որն ինչ-որ պահի վերածվեց քաշքշուկի. Ագրեսիվ վարքագիծ դրսեւորող մի խումբ թույլ չէր տալիս, որ Արցախի նախագահի խոսքը լսելի լինի բոլորին ու պարբերաբար աղմկում էին։ Բացի այդ՝ ծեծի ենթարկեցին նախագահի աշխատակազմի ղեկավարին։

Նրա կարծիքով՝ հստակ է, որ այնտեղ կային մարդիկ, որոնք կոնկրետ ուղղորդված էին, բայց կային նաև մարդիկ, ովքեր տեղյակ չէին, թե ինչ է պլանավորվում անել, պարզապես մտածում էին, որ կան հարցեր, որոնց պատասխանները պետք է տրվի ներկայացուցչությունում։

«Նրանք, ովքեր տեղեկացված չէին, թե ինչ է սպասվում՝ եկել էին այնտեղ՝ հուսալով, որ իրենց հարցերի պատասխանները կստանան, իրականում այդպես էին ընկալել այնտեղ հավաքվելու կոչերը։

Այդ իրավիճակում խառնաշփոթ ստեղծելը, միանշանակ, շատ ավելի հեշտ էր։ Ընդ որում՝ շատերը գիտեն ու հասկանում էին, որ որոշում կայացնողը՝ թե սոցիալական, թե մնացյալ հարցերով, այլևս Արցախի իշխանությունները չեն։ Սա ևս մեկ ապացույց է այն բանի, որ շատերը եկել են ուղղորդված։ Կարծում եմ, այդ դեմքերին արդեն նաև Հայաստանում շատ լավ ու բոլորը կճանաչեն, իսկ արցախցիներն իրականում արդեն շատ լավ գիտեն։

Դրանք հիմնականում 3 պրոյեկտներ են, որոնք ունեն իրենց արբանյակները և կարողացան տարածվել։

Այդ պրոյեկտները 2018 -ից հետո երբեմն առանձին- առանձին էին գործում, բայց նաեւ միասնաբար են գործում՝ ըստ անհրաժեշտության, ու հիմա ևս, ըստ պատգամավորի, կարծես թե միացել են ու նույն հարթակում են։

Հարցին, թե որոնք են այդ 3 պրոյեկտները, այս հավաքը կապվում է Սամվել Բաբայանի անվան հետ, արդյոք մյուս երկուսը Տիգրան Պետրոսյանն ու Արթուր Օսիպյանն են՝ Հակաբյանը պատասխանեց, որ ստացվում է՝ Երևանում էլ այլևս տեղեկացված են։

«Վստահեցնում եմ, այնտեղ հավաքված մարդկանց ուղղորդել են, ես նաև կարող եմ վստահեցնել, որ դա Արցախի հայերի դիրքորոշումը չէ։

Ավելին, այս օրերին իմ ապրելու միջոցն ու առաքելությունն է հնարավորության սահմաններում այցելել Երևանից դուրս գտնվող համայնքներ, նաև այլ հարթակներում շփումներ ունեմ տարբեր վայրերում գտնվող արցախցիների հետ, ասեմ, որ մարդիկ այսօր շատ ծանր վիճակում են ու իրենց մանիպուլացնելը հեշտ չէ։

Ես չեմ հանդիպել այսօր մի ընտանիքի, որ ծանրագույն խնդիրների մեջ չլինի, այսօր այդ մարդկանց մանիպուլացնելը հանցագործություն է։ Մարդիկ հիմա կենտրոնացած են իրենց ողջ մնացած զավակների, թոռների քիչ, թե շատ արժանապատիվ կեցություն ապահովելու վրա, մարդիկ հիմա դեռ ի վիճակի չեն հարցեր ձևակերպելու, ուր մնաց նման դիրքրոշումներ ու հստակ պահանջներ ձևակերպելու։ Դրա ժամանակն էլ է գալու, թե դիրքորոշման, թե պատասխանատուներից պահանջների, բայց հիմա դրա ժամանակը չէ, դա չի կարող արցախցիների դիրքորոշումը լինել»։

Աղբյուր` Փաստինֆո