Փաստ ինֆո

Կան ԼՂ-ից ՀՀ տեղափոխված բազմաթիվ մարմիններ, այդ թվում, քաղաքացիական անձանց, որոնց վրա առկա են խոշտանգումների կամ անդամախեղումների նշաններ։ Սա վկայում է, որ այդ անձինք ենթարկվել են հիշատակված վերաբերմունքի կոնկրետ տեսակների։ Ընդ որում, նրանց թվում կան երեխաներ, կանայք։ Այս մասին լրագրողների հետ զրույցում ասաց ՀՀ ՄԻՊ Անահիտ Մանասյանը։

Անձանց խոշտանգումների, մարմինների անդամախեղումների մասին տվյալները, որոնց մասին ահազանգել էր ՀՀ ՄԻՊ-ը, ձեռք են բերվել՝ փաստահավաք աշխատանքների արդյունքում, թվային տվյալներ, սակայն, ՄԻՊ-ը զերծ մնաց հայտնելուց։

«Ի տարբերություն նախկին գործընթացների, երբ շատ մեծ էր տեղեկությունը, աղբյուրները, հասանելիությունը, այս պահին ունենք շատ ավելի քիչ լուսաբանում կոնկրետ իրավախախտումների, բայց շատ հնարավոր է, որ դրանց թիվը շատ ավելի մեծ լինի։ Դա է պատճառը, որ պետք է այս պահին հնարավոր ամեն ինչ անել, որ բոլոր դեպքերը բացահայտվեն։ Ինչ վերաբերում է վատ վերաբերմունքի բոլոր դեպքերին, խոշտանգումներին, ապա ՄԻՊ նախնական զեկույցն անգլերեն լեզվով ներկայացվել է Հաագայի դատարանում՝ միջազգային իրավական հարցերով ՀՀ ներկայացուցչի կողմից»,- նշեց նա։

Թվային տվյալներ չհրապարակելով՝ ՄԻՊ-ը չհերքեց, որ մի քանի տասնյակ դեպքերի մասին է հայտնի, սակայն չի բացառվում, որ դեպքերը կարող են ավելի շատ լինել, այժմ, փաստահավաք աշխատանքներ պետք է իրականացվեն։ Անդրադառնալով Ադրբեջանում գերության մեջ պահվող Արցախի ռազմաքաղաքական գործիչներին՝ Մանասյանը նշեց, որ էթնիկ հայերի նկատմամբ Ադրբեջանում մարդու իրավունքների բոլոր հնարավոր սահմանափակումները և միջամտությունը բոլոր հիմնարար իրավունքների՝ ակնհայտ է, որ տեղի է ունենում։ ՄԻՊ-ը հայտնեց, որ փորձ կատարել է պաշտոնապես կապ հաստատելու, բայց արձագանք չի եղել։

«Հատուկ կցանկանամ նշել, որ անմեղության կանխավարկածի սկզբունքն է բոլոր մակարդակներում խախտվում այս անձանց նկատմամբ, որովհետև ի սկզբանե նրանց պիտակավորում են որպես հանցագործ՝ թե պետական մակարդակով, թե կոնկրետ քաղաքացիների կողմից։ Բացի այդ, արդար դատաքննության իրավունքի կարևոր սկզբունքներից մեկը՝ նաև անկողմնակալ և արդար դատարանի կողմից քննությունը անհնար է երաշխավորել՝ հաշվի առնելով նաև հայատյացության այն պետական մակարդակով հովանավորվող քաղաքականությունը, որն իրականացվում է Ադրբեջանում»,- ընդգծեց Մանասյանը։

Աղբյուր` Փաստինֆո