Փաստ ինֆո

ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի կալանավորման ժամկետը երկարացնելու որոշման հրապարակումից հետո՝ նույն օրը՝ Վերաքննիչ դատարանն անփոփոխ թողեց Լևոն Քոչարյանի կալանավորման վերաբերյալ առաջին դատական ակտը։

Ինչպես արդեն տեղեկացրել ենք՝ Լևոն Քոչարյանը մեկ ամիս ժամկետով կալանավորվել է սեպտեմբերի 25-ին՝ Երևանի ընդհանուր իրավասության քրեական դատարանի դատավոր Մասիս Մելքոնյանի որոշմամբ։ Ընդ որում, Մելքոնյանը մերժել էր ինքնաբացարկի միջնորդությունը, թեև մինչ դատավորի պաշտոնում նշանակվելը զբաղվել էր քաղաքական գործունեությամբ և բազմիցս քննադատել Ռոբերտ Քոչարյանին, ըստ այդմ, պաշտպանության կողմի դիտարկմամբ՝ Մասիս Մելքոնյանը չէր կարող անաչառ և օրինական դատարան լինել՝ Լևոն Քոչարյանի խափանման միջոցի հարցի քննության համար։

Կալանավորման որոշման դեմ բողոք էր ներկայացվել ինչպես պաշտպանության, այնպես էլ՝ դատախազության կողմից։ Դատախազությունը պահանջում էր բեկանել առաջին ատյանի դատարանի որոշումը մասնակի և Լևոն Քոչարյանին կալանավորել ոչ թե մեկ, այլ՝ երկու ամիս ժամկետով, իսկ պաշտպանության կողմը պահանջում էր վերացնել կալանավորման որոշումը։ Բողոքները գրավոր ընթացակարգով քննվել են դատավոր Մհեր Արղամանյանի կողմից, որը, ի դեպ, համարվում է իշխանամերձ դատավոր, և նրա կողմից գործի քննության մասնկցությունը պակաս խնդրահարույց չէր՝ նկատի ունենալով, որ վերջինիս որդին՝ Դավիթ Արղամանյանը մինչև դատավոր նշանակվելը մասնակցում էր Ռոբերտ Քոչարյանի դեմ բողոքի ակցիաներին՝ պահանջելով կալանքի տակ պահել նրան։ Մհեր Արղամանյանը, սակայն, մինչ կհրապարակեր որոշումը, վարույթն իրականացնող մարմինը միջնորդել է երկարացնել Լևոն Քոչարյանի կալանավորման ժամկետը ևս երկու ամսով, ինչը, «հապճեպորեն» բավարարվել է՝ կրկին դատավոր Մասիս Մելքոնյանի կողմից՝ Վերաքննիչ դատարանի որոշման հրապարակումից ժամեր առաջ ընդամենը, թեև Լևոն Քոչարյանի կալանքի ժամկետի ավարտին դեռևս երեք օր ժամանակ կար։ Ընդ որում, հատկանշական է, որ առաջին որոշումը կայացնելիս Մելքոնյանը կալանքի միջնորդությունը բավարարել էր մասնակի՝ կալանավորելով Լևոն Քոչարյանին մեկ ամիս ժամկետով, իսկ այժմ՝ ամբողջությամբ՝ երկու ամիս ժամկետով։

Կալանքի երկարացման որոշման հրապարակումից հետո Վերաքննիչ քրեական դատարանը՝ դատավոր Մհեր Արղամանյանի նախագահությամբ, մերժել է թե՛ դատախազության, թե՛ պաշտապանների բողոքները՝ առաջին ատյանի դատական ակտը թողնելով անփոփոխ։

Հիշեցնենք, որ սեպտեմբերի 22-ի առավոտյան Լևոն Քոչարյանին ոստիկանության ծառայողները Լևոն Քոչարյանին դաժան ծեծի ենթարկելով բերման էին ենթարկել: Վնասվածքների հետևանքով Լևոն Քոչարյանը տեղափոխվել էր հիվանդանոց։ Նույն օրը հայտնի դարձավ, որ Լ. Քոչարյանը ձերբակալվել է՝ ոստիկանության 4 ծառայողի՝ «բերետավորի», նկատմամբ իբրև բռնություն գործադրելու համար։ Վարույթն իրականացնող մարմինը մեղադրանք է ներկայացրել, ապա՝ կալանավորման միջնորդությամբ դիմել դատարան, որը բավարարվել է։

Հեղինակ՝ Իզաբել Սահակյան

Աղբյուր` Փաստինֆո