Փաստ ինֆո

Ազատ գյուղի տարածքում տեղակայված զորամասի կացարանում 15 զինծառայողի կյանք խլած ողբերգական հրդեհի գործով կալանքի տակ գտնվող Գոռ Աղեկյանի և Մառլեն Սարգսյանի պաշտպանները վերաքննիչ բողոք են ներկայացրել՝ պահանջելով կալանքից ազատել իրենց պաշտպանյալներին։

Ինչպես արդեն տեղեկացրել ենք՝ Գեղարքունիքի մարզի ընդհանուր իրավասության դատարանը՝ դատավոր Վարդան Հարությունյանի նախագահությամբ, նախնական դատալսումների ընթացքում քննության առնելով Եղիշե Հակոբյանի, Գոռ Աղեկյանի, Մառլեն Սարգսյանի նկատմամբ ընտրված խափանման միջոց կալանավորումն անփոփոխ թողնելու կամ անազատության հետ չկապված այլ խափանման միջոցով փոխարինելու վերաբերյալ հարցը, որոշել էր անփոփոխ թողնել կալանքը՝ ժամկետը երկարացնելով երեք ամիս ժամկետով։ Առաջին ատյանի դատարանը գտել է, որ առկա է հավանականություն, որ մեղադրյալները, գտնվելով ազատության մեջ, կարող են անօրինական ազդեցություն ունենալ գործով անցնող անձանց նկատմամբ։

«Փաստինֆո»-ն տեղեկացավ, որ Գոռ Աղեկյանի և Մառլեն Սարգսյանի պաշտպանները վերաքննիչ բողոքներ են ներկայացրել՝ պահանջելով բեկանել առաջին ատյանի դատարանի որոշումները և կալանքը փոխարինել անազատության հետ չկապված խափանման միջոցներով։
Բողոքները կքննվեն Վերաքննիչ քրեական դատարանի դատավոր Լուսինե Ալավերդյանի նախագահությամբ։
Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո