Փաստ ինֆո

Կառավարությունն այսօրվա նիստում հաստատեց բուհերի ընդունելության հաջորդ տարվա մասնագիտությունների և ընդունելության քննությունների ցանկը:

Կան մասնագիտություններ, որոնց համար սահմանվում են կամ ընտրական քննություններ՝ հնարավորություն տալով դիմորդներին իրենց ցանկությամբ ընտրել քննական առարկան:

Նախորդ՝ 2023-2024 ուսումնական տարվա համար նախատեսված ցանկի համեմատ նախագծում որոշակի փոփոխություններ են կատարվել։

Մասնավորապես. Երևանի պետական համալսարանի «Միջուկային ռեակտորների ֆիզիկա», «Նանոֆիզիկա և առաջատար տեխնոլոգիաներ», «Երկակի նշանակության տեխնոլոգիաների ֆիզիկա» կրթական ծրագրերը հանվել են ցանկից՝ որպես առանձին մասնագիտություններ դրանք ներառված են «Ֆիզիկա» ընդհանրական մասնագիտության շրջանակում՝ որպես առանձին մասնագիտացումներ, ցանկը լրացվել է նոր՝ «Ռադիոֆիզիկա և համակարգչային տեխնոլոգիաներ» մասնագիտությամբ:

Միաժամանակ, Երևանի պետական համալսարանում «Ֆիզիկա», «Ռադիոֆիզիկա» մասնագիտությունների համար նախատեսվող քննությունների շարքում չի ընդգրկվել «Անգլերեն» քննությունը՝ որպես կամընտրական քննություն, ամրագրելվել են միայն «Ֆիզիկա» և «Մաթեմատիկա» առարկաների քննությունները:

Երևանի պետական համալսարանի «Միջազգային հարաբերություններ» կրթական ծրագրի ընդունելության քննություններում ևս կատարվել են փոփոխություններ՝ «Հայոց լեզվի» քննությունը սահմանվել է պարտադիր, «Հայոց պատմության» և «Օտար լեզվի» քննությունները՝ կամընտրական:

Նույն փոփոխությունները կատարվել են նաև բոլոր բարձրագույն ուսումնական հաստատությունների «Միջազգային հարաբերություններ» մասնագիտություն ունեցող կրթական ծրագրերի քննություններում:
Հայաստանի ազգային պոլիտեխնիկական համալսարանի մասնագիտությունների ցանկում ներառվել են նոր՝ «Բլոկչեյն և ՎԵԲ3 տեխնոլոգիաներ» և «Ավիատիեզերական ճարտարագիտություն» կրթական ծրագրերը` համապատասխանաբար «Տեղեկատվական անվտանգություն» «Ավիացիոն և հրթիռային տեխնիկա» շրջանակներում։

Հայաստանի ազգային ագրարային համալսարանի 2024-2025 ուսումնական տարվա ընդունելության բակալավրի ու անընդհատ և ինտեգրացված կրթական ծրագրերի (առկա և հեռակա ուսուցման) մասնագիտությունների ցանկում «Ագրոնոմիա», «Անասնաբուծություն» և «Անասնաբուժություն» մասնագիտություններով ընդունվելու համար «Մաթեմատիկան», որպես պարտադիր մրցութային առարկա փոխարինվել է «Կենսաբանություն» առարկայով:

«Ագրոէկոլոգիա», «Ագրոնոմիա, սելեկցիա և գենետիկա», «Բույսերի պաշտպանություն», «Ջերմատնային ագրոտեխնոլոգիա», «Կենդանագիտություն և կենսատեխնոլոգիա», «Անտառային տնտեսություն և բնակավայրի կանաչապատում», «Անասնաբուժություն» կրթական ծրագրերի ընդունելության քննությունները փոխարինվել են «Կենսաբանություն», «Ֆիզիկա» կամ «Քիմիա» առարկաներով:
Միաժամանակ հարկ է արձանագրել, որ մասնագիտությունների ցանկում բուհերի ուղղվածությանը չհամապատասխանող մասնագիտություններով հիմնականում չեն հատկացվում անվճար տեղեր կամ հատկացվում է 1-2 տեղ։ Մրցույթն անցկացվում է հիմնականում միայն վճարովի տեղերի համար, օրինակ՝ 2023-2024 ուսումնական տարվա համար տնտեսագիտություն մասնագիտությունով Հայաստանի ազգային պոլիտեխնիկական համալսարանում, Ճարտարապետության և շինարարության Հայաստանի ազգային համալսարանում անվճար տեղեր չեն հատկացվել, իսկ օպերատորություն, ռեժիսուրա, լրագրություն մասնագիտություններին՝ Խ. Աբովյանի անվան հայկական պետական մանկավարժական համալսարանում տրամադրվել է 1-2 տեղ):

2024-2025 ուստարվա համար ըստ մասնագիտությունների անվճար և վճարովի ընդունելության տեղերը հաստատելու մասին համապատասխան կառավարության որոշման նախագիծը մշակելիս կվերանայվեն, ինչպես վճարովի տեղերի քանակները կնվազեն, կքննարկվի վերոնշյալ 1-2 անվճար տեղը հատկացնելու հարցը, մասնաճյուղերում դրանց նպատակահարմարությունը։

Աղբյուր` Փաստինֆո