Փաստ ինֆո

Արցախից բռնի տեղահանված 15 400 դպրոցական արդեն շարունակում է կրթությունը հայաստանյան դպրոցներում։ Այս մասին այսօր կառավարության նիստից հետո լրագրողների հետ զրույցում ասաց ՀՀ ԿԳՄՍ նախարար Ժաննա Անդրեասյանը՝ ընդգծելով, որ պատրաստ են ուղղորդել, թե որ դպրոցներում կան ազատ տեղեր։

«Արցախցից բռնի տեղահանված երեխաների համար դպրոցներում ուսուցման նպատակով ուզում ենք գտնել երկարաժամկետ լուծումներ, դրա համար էլ առաջին հերթին երեխաները տեղավորվում են այնտեղ, որտեղ կան լիցենզիոն ազատ տեղեր։ Եթե տվյալ բնակավայրում ազատ տեղ չկա, ապա երեխաներն ընդունվում են դպրոց՝ անկախ ազատ տեղերի առկայությունից։ Այսինքն, այստեղ մենք ավելի շատ իրազեկման խնդիր ունենք»,- նշել է նախարարը։

Անդրադառնալով մանկապարտեզներին՝ նա ընդգծեց, որ Երևան քաղաքում շուրջ 8000 երեխա սպասում է դպրոց գնալու իր հերթին և այստեղ օբյեկտիվորեն հնարավորությունը երեխաներին մանկապարտեզ ընդունելու շատ սահմանափակ է։ «Բոլոր այն տեղերում, որտեղ այդ հնարավորությունը կա՝ համայնքապետարանները արագ արձագանքում են և երեխաներն ընդունվում են։ Թե քանիսն են արդեն ընդունվել մանկապարտեղ՝ հստակ թիվ չեմ կարող ասել, բայց ասեմ, որ մանկապարտեզային տարիքի ավելի քան 9000 երեխա կան բռնի տեղահանված։ Բաշխվածությունը տարբեր է՝ Երևան և մարզեր, երբ մարդիկ արդեն վերջնական տեղորոշվեն, թե որտեղ են մնալու առաջիկա ամիսներին՝ կարծում եմ, այդ հարցի լուծումն էլ կգտնենք»։

Ինչ վերաբերում է բուհերին՝ Անդրեասյանն ասաց, որ կրթաթոշակային ծրագիրը մեկնարկել է և բոլոր բռնի տեղահանված ուսանողները ունեն հնարավորություն պետական բուհերում իրենց կրթությունը շարունակելու։ «Հրապարակված է բուհերի, քոլեջների ուսումնարանների ցանկը եւ արդեն 1 155 ուսանող դիմել է մեր բուհեր, հաշվառվել են։ Ուսանողների 50 տոկոսը բուհերի ուսանողներ են, մյուս 50 տոկոսը՝ քոլեջների և ուսումնարանների»։

Նա նաև տեղեկացրեց, որ 85 ուսուցիչ առավոտվա տվյալներով արդեն ընտրել է իր աշխատավայրը։
« Այդ ուսուցիչները նաև 30 տոկոս հավելավճար են ստանալու եւ արտամրցութային կարգով կանցնեն աշխատանքի։ Սյունքում, Վայոց ձորում և Տավուշի առանձին բնակավայրերում նաև լրացուցիչ 50 000 դրամ են ստանալու»։

Աղբյուր` Փաստինֆո