Փաստ ինֆո

Կառավարությունն այսօրվա նիստում պետական գույքը աճուրդով օտարելու մասին որոշում կայացրեց:

Խոսքը ՀՀ ՏԿԵՆ պետական գույքի կառավարման կոմիտեին ամրացված, պետական սեփականություն հանդիսացող, ՀՀ Արարատի մարզի Արտաշատ քաղաքի Ա. Խաչատրյան փողոց 116/1 մասնաշենք հասցեում գտնվող 4 945.11 քառ. մետր մակերեսով անշարժ գույքի, ինչպես նաև դրա զբաղեցրած, օգտագործման և սպասարկման համար հատկացված 0.6858 հեկտար մակերեսով հողամասի մասին է:

2023 թվականի մարտի 16-ի դրությամբ գույքի գնահատված շուկայական արժեքը կազմել է 595ն մլն 200 հազար դրամ։ Այս արժեքում ներառված, հատկացված հողամասի գնահատված շուկայական արժեքը կազմում է 222 մլն 100 հազար դրամ։

Հատկացված հողամասի տվյալ պահին գործող հողամասի շուկայական արժեքին մոտարկված կադաստրային արժեքը 30 մլն 461 հազար դրամ է։

Աճուրդով օտարման ենթակա գույքի մեկնարկային գին է սահմանվել գույքի գնահատված արժեքը՝ 595 մլն 200 հազար դրամ։

Աճուրդին մասնակցելու նախավճարը սահմանվել է գույքի մեկնարկային գնի 5 տոկոսը՝ 29 մլն 760 հազար դրամը, որը աճուրդի հաղթող մասնակցի համար համարվում է գույքի վաճառքի գնի մաս և գնորդի կողմից հետագա վճարումները կատարելուց հրաժարվելու դեպքում վերադարձման ենթակա չէ ու փոխանցվում է ՀՀ պետական բյուջե։

Գնորդը պարտավոր է վճարել նաև գույքի արժեքի որոշման ծառայությունների վճարը՝ 1 մլն 479 հազար դրամ գումարը (ներառյալ՝ ԱԱՀ), որը ենթակա է վճարման աճուրդի արդյունքների մասին արձանագրությունը ստորագրելու օրվանից 10 օրվա ընթացքում՝ գնահատողի համապատասխան հաշվին ու չի ներառվում աճուրդի արդյունքում գնորդի առաջարկած գնի մեջ։

Նախագծով նախատեսվում է նաև առաջին աճուրդի ժամանակ չվաճառված գույքի վաճառքի նպատակով կազմակերպել հերթական աճուրդներ՝ գույքի վաճառքի մեկնարկային գինը նվազեցնելով վերջին աճուրդի մեկնարկային գնի 15 տոկոսի չափով, բայց ոչ պակաս քան գնահատված արժեքի 50 տոկոսի չափը։

Աղբյուր` Փաստինֆո