Փաստ ինֆո

Աշխատանքի և սոցիալական հարցերի նախարար Նարեկ Մկրտչյանն այսօր ընդունել է ՀՀ-ում Բելգիայի թագավորության արտակարգ և լիազոր դեսպան Էրիկ Դե Մույնքին։

Նարեկ Մկրտչյանը ներկայացրել է ԼՂ-ից  բռնի  տեղահանված  անձանց  համար  Աշխատանքի  և  սոցիալական  հարցերի  նախարարության  կողմից իրականացվող  ծրագրերը,  մանրամասնել  սոցիալական պաշտպանության ոլորտում այս պահին սահմանված առաջնահերթությունները։

«ԼՂ-ից բռնի տեղահանված մեր հայրենակիցների առաջնային կարիքների բավարարման և անհրաժեշտ սոցիալական ծառայությունների տրամադրման նպատակով՝ նախարարության կողմից մշակվել և իրականացվում են սոցիալական աջակցության ծրագրեր։ Մեր ամենօրյա աշխատանքի և ուշադրության կենտրոնում են նաև առավել խոցելի խմբերը, հատկապես՝ միայնակ տարեցները, շուրջօրյա խնամքի կարիք և հաշմանդամություն ունեցող անձինք, առանց ծնողական խնամքի մնացած երեխաները, ովքեր ՀՀ մուտք գործելու առաջին իսկ օրվանից մեր հոգածության և խնամքի ներքո են»,- նշել է նախարարը։

Էրիկ Դե Մույնքը հայտնել է Բելգիայի Թագավորության պատրաստակամության մասին՝ աջակցելու ԼՂ-ից բռնի տեղահանված անձանց և նշել, որ կան պայթյունից տուժածներ, որոնք անհրաժեշտ բժշկական ծառայություններ ստանալու նպատակով տեղափոխվել են Բելգիա։

Անցնելով օրակարգային այլ հարցերի՝ կողմերը քննարկել են նաև աշխատանքի և սոցիալական պաշտպանության ոլորտում երկկողմ հարաբերությունների ընդլանմանն առնչվող մի շարք հարցեր։ Մասնավորապես, դիտարկվել են ուսումնասիրությունների իրականացման և փորձի փոխանակման հնարավորությունները՝ Բելգիայի Թագավորության Սոցիալական ապահովության դաշնային հանրային ծառայության գործունեության, կանանց տնտեսական ակտիվացմանն ուղղված ծրագրերի, ակտիվ ծերացման քաղաքականության, գործազրկության հաղթահարման, ինչպես նաև ինքնազբաղվածության ապահովման վերաբերյալ։ Նախարար Մկրտչյանը հետաքրքվել է նաև հաշմանդամություն ունեցող անձանց տրամադրվող «Disability Advantage Card»-երի կիրառման՝ բելգիական փորձով։

Անդրադառնալով ոլորտային համագործակցությանը՝ նախարարը նշել է, որ 2023 թ․ մարտին Նյու Յորքում կայացած ՄԱԿ կանանց կարգավիճակի հարցերով հանձնաժողովի 67-րդ նստաշրջանի ընթացքում ոլորտային մի շարք հարցեր են քննարկվել Բելգիայում ֆրանսիական համայնքի փոխնախագահ, մշակույթի, լրատվամիջոցների, կանանց իրավունքների, երեխաների խնամքի և առողջության նախարար Բենեդիկտ Լինարդի հետ հանդիպման ժամանակ։ Մասնավորապես՝ անդրադարձ է կատարվել կանանց և երեխաների հիմնահարցերի ոլորտում համագործակցության հնարավորություններին, մտքեր են փոխանակվել նաև երկու երկրներում հասարակության տարբեր ոլորտներում երեխաների ներգրավվածության ապահովմանն ուղղված ծրագրերի իրականացման վերաբերյալ։ Նախարարը հույս է հայտնել, որ արդեն իսկ քննարկված ոլորտային հարցերի շուրջ արդյունավետ և ակտիվ աշխատանքներ կտարվեն։

Էրիկ Դե Մույնքը ներկայացրել է խոցելի խմբերին և աջակցության կարիք ունեցող այլ անձանց սոցիալ-հոգեբանական, կարիքների գնահատման գործընթացների վերաբերյալ իր երկրում գործող մեխանիզմները։

«Մենք կարևորում ենք ձեզ հետ համագործակցությունը, նախ քանի որ Հայաստանը ժողովրդավարական պետություն է, ինչպես նաև այն հանգամանքով պայմանավորված, որ Բելգիայում կա ակտիվ հայ համայնք։ Բելգիայի Թագավորությունն ու Եվրամիությունը պատրաստակամ են աջակցել և ցանկանում են ուղեկցել Հայաստանին ժողովրդավարական բարեփոխումների ճանապարհին»,- ասել է դեսպանը։

Հանդիպման ավարտին կողմերը պատրաստակամություն են հայտնել կարճ ժամանակում ընթացք տալ քննարկված ծրագրերին։

Աղբյուր` Փաստինֆո