Փաստ ինֆո

Մահմեդական աշխարհը հակաիսրայելական լուրջ կոալիցիա է ստեղծել եւ գործնականում նախատեսվող սանկցիաներից բացի ռազմական գործողություներն ավելի լայնամասշտաբ կարող են դառնալ՝ ներգրավելով պետություններ, մասնավորապես, Իրանը։ Այս մասին «Փաստինֆո»-ի հետ զրույցում ասաց միջազգայնագետ Դավիթ Կարապետյանը։

«Իրավիճակը, համենայն դեպս, Իսրայելի համար շատ ավելի ծանր է, քանի որ ողջ պատասխանատվությունը կրում է Իսրայելը։ Փաստացի միջազգային հանրության և առհասարակ միջազգային ասպարեզում խաղացողների դիրքորոշումը հետևյալն է, որ մեղավոր, որպես այդպիսին, թիրախավորվում է Իսրայելը »,-նշեց Կարապետյանը՝ արձանագրելով, որ գործողությունները դիտարկվում են որպես ահաբեկչական, մանավանդ, որ վնասում են քաղաքացիական ենթակառուցվածքները։ Իսրայելական կողմին այլ բան չէր մնում, քան փորձել ապացուցել, որ Գազայի հիվանդանոցի հրթիռակոծության՝ 800-ից ավել զոհի դեպքը իրենց ձեռքի գործը չէ, սակայն, քաղաքագետն արձանագրում է, որ ամբողջ ինֆորմացիան տանում է նրան, որ դա կազմակերպված, հստակ քայլ էր, որ կիրառվեց։

«Գուցե դա նպատակ էր հետապնդում, որ հենց հողի վրա նման կերպ փոխեին պաղեստինյան զորքերի համար իրավիճակը, բայց դա ամբողջ մահմեդական աշխարհին հանեց նրանց դեմ։ Փաստացի, ամբողջ աշխարհը տարատեսակ քաղգործիչներից բռնած՝ մինչև պետության ղեկավարները, հակասիրայելական դիրքորոշմամբ են հանդես եկել, որը դժվարացնում է նրանց կացությունը»,- նշեց նա՝ արձանագրելով, որ Իսրայելի վրա ճնշում կա, որ այլևս հումանիտար որևէ աղետ չլինի, ինչով պայմանավորված էլ հետաձգվել է ցամաքային ներխուժումը։ Ավելին, մահմեդական աշխարհին ավելի բորբոքեց Իսրայելի ղեկավար կազմի հայտարարությունը, թե «որտեղ են տեսել վերջին շրջանում պատերազմ, որ քաղաքացիական անձինք չզոհվեն», ինչն ավելի շատ նման էր ծաղրի։ Ինչ վերաբերում է Իրանին, ապա քաղաքագետն արձանագրեց, որ ամենամեծ դերակատարն այս կոնֆլիկտում, առայժմ չեզոք կարգավիճակում Իրանն է, որի ԱԳՆ-ն հստակ դիրորոշում է հայտնել՝ նշելով, որ ամենալավ պատերազմը չսկսած պատերազմն է, երբ նաև վտանգների հաշվարկներով դրդված՝ պետք է առաջինը հասնեն պաղեստինյան ժողովրդին և չի բացառվում, որ Իրանն անմիջական ռազմական գործողությունների մասնակից դառնա։

«Նույնիսկ տեսնում ենք, թե Թուրքիայում ինչպիսի մեծ ալիք է բարձրացել՝ հակաիսրայելական։ Այս ամենը թույլ է տալիս արձանագրելու, որ Իսրայելի ռազմական գործողությունները չեն դիտարկվում որպես սուվերեն տարածքի պաշտպանություն, այլ, որ ցեղասպանական էթնիկ զտման քաղաքականություն է գնում, հատկապես, որ իրենք հանձն են առել, որ ամբողջ ջրային ռեսուրսը կանգնեցված է և չի թույլատրվում։ Եգիպտոսից են օգնություն տրամադրում և այդ հումանիտար բեռների մուտքի համար նույնիսկ արգելքներ են դրված»,- ասաց Դավիթ Կարապետյանը։

Միջազգայնագետը գտնում է, որ սա վերածվում է կրոնական պատերազմի, մանավանդ՝ հիվանդանոցին հարվածելուց հետո։

«Ինչ է նշանակում թիրախավորել քաղաքացիականներին, այն էլ՝ հիվանդանոցը։ 800-ից ավել զոհերը վառ ապացույցն են, որ խոսքն արդեն չափից դուրս, չափն անցած ռազմական գործողությունների մասին է, որը չի կարող անհետևանք մնալ։ Հետևաբար, «Հեզբոլլահն» է հայտարարել, որ սա չի թողնի հենց այնպես, վերջնաժամկետ է տրվել, որ եռակի անգամ ավելի ուժեղ հարված են հասցնելու Իսրայելին»,-ասաց նա՝ արձանագրելով, որ արաբական ողջ թերակղզու երկրները, այդ թվում՝ Եգիպտոսը, Թուրքիան հակաիսրայելական կոալիցիա են ստեղծում․ «Եթե բացառի կոալիցիա չլինի, ապա, համենայն դեպս, նրանց բոլորի արտաքին ընկալումը նույնն է, որ պետք է համատեղ պայքարել Իսրայելի ռազմական գործողությունների և առհասարակ Իսրայել պետության դեմ»։
Հեղինակ՝ Իզաբել Սահակյան

Աղբյուր` Փաստինֆո