Փաստ ինֆո

Չի կարելի քաղաքականության մեջ գնալ բամբասել, նվնվալ, շատ տգեղ է, առավել ևս, որ դա որևէ արդյունք ակնհայտորեն չի տալու, դրանից ոչ Եվրոպայում է Հայաստանի նկատմամբ հարգանքն ավելանալու, ոչ էլ Ռուսաստանում։

Այս մասին «Փաստինֆոյի» հետ զրույցում ասաց քաղաքական վերլուծաբան Արմեն Բաղդասարայանն՝ անդրադառնալով Եվրոպական խորհրդարանում Նիկոլ Փաշինյանի այսօրվա ելույթին, որտեղ նա դժգոհեց ՀԱՊԿ-ից, իր ռազմավարական դաշնակիցներից՝ նշելով, որ ԼՂ-ն հայաթափվեց ՌԴ-ի խաղաղապահ զորախմբի անգործության արդյունքում, և միաժամանակ, հայտարարարեց անվերապահ ԵՄ-ի համագործակցելու պատրաստամության մասին. «ՀՀ-ն պատրաստ է առավել մոտ լինել ԵՄ-ին, այնքան, ինչքան Եվրամիությունը դա հնարավոր կհամարի»,- ասել է Փաշինյանը։

Արմեն Բաղդասարյանի գնատմամբ՝ անգամ երկարատև հեռանկարում ԵՄ անդամ դառնալու մասին խոսելն ավելորդ է։ «նման բան չկա ԵՄ ծրագրերում և չի էլ կարող լինել, առավել ևս, որ ԵՄ-ն նման ցանկություն չունի և չէր էլ ցանկանա էդպես միանգամից ՀՀ-ի համար պատասխանատվություն ստանձնել։ Ի վերջո, նրանք դա ուղիղ են ասում»,- նշել է բանախոսը։

Ինչ վերաբերում է պատասխանատվությունը ՌԴ-ի վրա դնելուն, ապա, նրա դիտարկմամբ, դա Նիկոլ Փաշինյանի համար նորություն չի։ «Նա միշտ իր ձախողումները փորձել է բարդել ուրիշների վրա, այս անգամ ամենահարմարը ռուս խաղաղապահներն էին։ Հարմար առիթի դեպքում էլ արևմուտքի վրա կբարդի պատասխանատվությունը ու կասի, թե ինձ խաբել էին։ Այսինքն, Նիկոլ Փաշինյանի թիվ մեկ խնդիրն է պատասխանատվությունը իր վրայից ուրիշների վրա բարդելը։ Կարծում եմ, որ նա որևէ նորություն ոչ հայ հասարակության համար ասաց, ոչ էլ Եվրախորհրդարանի»։

Նրա դիտարկմամբ՝ այս ելույթը որևէ դրական հետևանք չի ունենա Հայաստան-ԵՄ հարաբերությունների համար, իսկ հայ ռուսական հարաբերությունների առումով՝ հետևանքները կլինեն բացասական։

«Հայ -ռուսական հարաբերություններն էլ ավելի կսրվեն, այսինքն, այն թեթև նշմարվող լույսը, որ կարելի է ռուսական հարթակում բանակցությունների միջոցով կանխել հաջորդ հնարավոր ագրեսիան՝ այդ հույսերը նման հայտարարություններից հետո նվազում են»։

Անդրադառնալով Ադրբեջանի կողմից Հայաստանի նկատմամբ տարածքային հավակնություններին ու ագրեսիայի հավանականության մասին խոսելիս Փաշինյանի՝ փորձագիտական հանրությանը հղում անելուն՝ նա ընդգծեց, որ դա խոսույթ է շարքային քաղաքական գործչի կամ խմբագրի։ «Պետության ղեկավարը նման վկայակոչումներ անելու և նման հիմնավորումներ բերելու իրավունք չունի։

Երկրորդ, եթե նման ագրեսիայի հավանականություն իսկապես կա՝ այդ դեպքում պետության ղեկավարը պարտավոր է, ոչ թե այդ մասին ահազանգել այն հարթակներում, որոնք դա կանխելու որևէ լծակ կամ ցանկություն չունեն, այլ հակատակը, պետք է փորձեն արտաքին քաղաքականությունը կառուցել այն ուժերի հետ, որոնք նման ագրեսիան կանխելու իրական լծակներ ունեն։

Մասնավորապես, եթե ՌԴ-ն և Իրանը կարող են կանխել այդ ագրեսիան, իսկ ԵՄ-ն չի կարող, ապա բնական է, որ նման ագրեսաիայի հավանականության դեպքում պետք է խոսել ՌԴ-ի և Իրանի հետ, ոչ թե արևմուտքի հետ, որովհետև արևմուտքը կարող է բանավոր սատարել, թղթի վրա հայտարարություններ անել, բայց գործնական աջակցություն Հայաստանին դժվար թե ցուցաբերի։

Ես, առհասարակ, այս ելույթից տպավորություն ունեմ, որ Նիկոլ Փաշինյանին հետաքրքրում էր ոչ թե Հայաստանի Հանրապետության շահերը, այլ իր իշխանությունը պահպանելու շահերը, դրա համար էլ՝ առանց անուններ տալու, հատուկ շեշտում է, որ ՌԴ-ն ոչ միայն մեզ չօգնեց, այլև հրապարակային կոչեր արեց ՀՀ իշխանություններին տապալելու, այսինքն, այդ հարցն է իրեն ամենից շատ մտահոգել։ Այո, ՌԴ-ից նման կոչեր հնչել են, իսկ արևմուտքից չեն հնչել, դրա համար էլ արևմուտքն իրեն ավելի հոգեհարազատ է։ Ամեն դեպքում՝ Հայաստան պետությունն այս այցից ու ելույթից որևէ բան չի շահելու»։

Աղբյուր` Փաստինֆո