Փաստ ինֆո

ՀՀ ՊՆ լրատվության վարչության նախկին պետ Գևորգ Ալթունյանը հոկտեմբերի 12-ին լրացուցիչ հարցաքննվել է, մանրամասն ցուցմունք տվել՝ հանգամանալից անդրադառնալով մեղադրանքի տարբեր հանգամանքներին։ Դրանից հետո ծավալուն միջնորդություն ենք ներկայացրել վարույթն իրականացնող մարմնին՝ Գևորգ Ալթունյանի ցուցմունքից բխող տեղեկությունները պարզելու ուղղությամբ գործողություններ կատարելու համար։ Այս մասին «Փաստինֆո»-ի հետ զրույցում ասաց Գևորգ Ալթունյանի պաշտպան Գոռ Սաղոյանը։

Հիշեցնենք, որ Գևորգ Ալթունյանն ու ևս 4 անձ, այդ թվում՝ Dasaran.am կայքի հիմնադիր Սուրեն Ալոյանը, մեղադրվում են ՊՆ գնումների գործընթացի արդյունքում «փաստաթղթերում կեղծ տեղեկություններ զետեղելու եղանակով պետությունից 106 մլն 300 հազար դրամ հափշտակելու մեջ։

Գևորգ Ալթունյանի նկատմամբ որպես խափանման միջոց դատարանի որոշմամբ կիրառվել էր գրավը և տնային կալանքը, ինչի դեմ դատախազությունը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը և Ալթունյանի նկատմամբ որպես խափանման միջոց կիրառել կալանավորումը՝ երկու ամիս ժամկետով։Վերաքննիչ դատարանը, փաստացի, բավարարել է դատախազության բողոքը։

Գևորգ Ալթունյանի պաշտպան Գոռ Սաղոյանը «Փաստինֆո»-ի հետ զրույցում հայտնեց, որ Վերաքննիչ դատարանը գտել է,թե Գևորգ Ալթունյանը, մնալով ազատության մեջ, կարող է ազդեցություն ունենալ վարույթի մասնակիցների նկատմամբ։ Պաշտպանության կողմը քննարկում է նաև վճռաբեկ բողոք ներկայացնելու հարցը։ Գևորգ Ալթունյանը, ինչպես արդեն արձանագրվեց, հոկտեմբերի 12-ին՝ դատարանի որոշումից հետո, լրացուցիչ հարցաքննվել է, թեև պաշտպանության կողմն ավելի վաղ էր պահանջում լրացուցիչ հարցաքննություն։ Այժմ սպասում են վարույթն իրականացնող մարմնի որոշմանը՝ Գևորգ Ալթունյանի ցուցմունքից բխող տեղեկությունները պարզելու ուղղությամբ գործողություններ կատարելու պահանջով միջնորդության վերաբերյալ, որովհետև այդ գործողության կտատարումը հենց վարույթն իրականացնող մարմնի շահերից է բխում։

«Նկարած մեղադրանք է իրականում։ Իրականության հետ որևէ կապ չունեցող տեղեկություններ են նշված, բայց քանի որ ԶՈՒ-երի կարիքների մասին է խոսքը, չեմ կարող մանրամասներ բարձրաձայնել այս պահին, հույս ունեմ, որ շատ ակտիվ և սեղմ ժամկետներում քննություն կանեն և պարոն Ալթունյանը երկար չի մնա կալանքի տակ»,- նշեց Սաղոյանը։
Նրա փոխանցմամբ՝ ցուցմունքներ, որպես այդպիսին, Գևորգ Ալթունյանի դեմ չկան, թեև վարույթն իրականացնող մարմինը որոշ տվյալներ ներկայացրել է դատարան, որոնցով, ըստ իրենց, մեղադրանքը հիմնավոր է, սակայն պաշտպանության կողմի գնահատմամբ՝ ցուցմունքներից որևէ մեկը, որպես այդպիսին, Ալթունյանի դեմ չէ։ Ավելին, այս մեկ ամսվա ընթացքում որևէ առերեսում չի իրականացվել։ Առնվազն կալանավորման միջնորդության փաթեթում Ալթունյանի դեմ ցուցմունքներ չկան։ Քրեական վարույթը հարուցվել է ՕՀՄ-ների հիման վրա, սակայն, դա ևս պաշտպանության կողմն անհասկանալի է գնահատում՝ նշելով, որ եթե ԱԱԾ-ն մի փոքր ավելի խորանար այդ գործողություններում կամ ՔԿ-ն չշտապեր մեղադրանքներ առաջադրել, ապա մեղադրանքները, ըստ փաստաբանի, չէր էլ առաջադրվի։

«Պետք էր ընդամենը մի փոքր ավելի ստուգել այդ տվյալները, որոնք առերևույթ վկայում են ինչ-որ հանցագործության մասին»,-նշեց փաստաբանը։

Իսկ թե ինչով է պայմանավորված վարույթն իրականացնող մարմնի շտապողականությունը՝ փաստաբանն անհասկանալի է գնահատում, ենթատեքստ չի տեսնում, գուցե հետագայում պարզվի, միայն նշում է, որ պետք է որոշակի քննություն կատարվեր։ Հարցին՝ արդյո՞ք դա կարող է կապված լինել նաև Ալթունյանի հեղինակած «Առաքել» պիեսի հետ, որտեղ բավականին հետաքրքիր դրվագներ կան, փաստաբանը նշեց՝ ոչինչ չի կարող բացառել։

«Ուղղակի մեղադրանքն աբսուրդ է։ Սա այն մեղադրանքը չէ, որ պաշտպանական մարտավարությունից ելնելով պարզապես չեն ընդունում, սա իսկապես աբսուրդ է։ Մենք համբերատար սպասում ենք այն օրվան, որ այն մեծ շուքով, որով ՔԿ-ն հաղորդագրություն տարածեց Գևորգ Ալթունյանի ձերբակալման մասին՝ հրապարակելով նրան բերման ենթարկելու կադրերը, նույնկերպ հերքում հրապարակի՝ ներկայացնելով մեղադրանքի անհիմն լինելը» ,- ասաց Սաղոյանը։

Հեղինակ՝ Իզաբել Սահակյան

Աղբյուր` Փաստինֆո