Փաստ ինֆո

Արցախի ԱԽ նախկին քարտուղար, «Միասնական հայրենիք» կուսակցության ղեկավար Սամվել Բաբայանի՝ Արցախի ղեկավարության դեմ արված հայտարարությունների հիման վրա քրեական վարույթ է նախաձեռնվել։

Հիշեցնենք, որ Արցախի ԱԽ նախկին քարտուղար, պաշտպանության նախկին նախարար Սամվել Բաբայանը Ադրբեջանի կողմից Արցախի դեմ ագրեսիայի, ցեղասպանական գործողությունների ընթացքում կարողացել է «անարգել» հատել Լաչինում տեղակայված ադրբեջանական անցակետը և Երևան հասնելուց հետո՝ հոկտեմբերի 6-ին Հանրային հեռուստաընկերությանը տվածհարցազրույցում հայտարարել, որ Արցախի ղեկավարությունն է Արցախը Ադրբեջանին հանձնել ՝ իբրև կոչ անելով Դատախազությանը դա ընդունել որպես հայտարարություն հանցագործության մասին և քրեական գործ հարուցել։

«Արցախի ԱԺ 22 պատգամավորը, նաև Արկադի Ղուկասյանը, Բակո Սահակյանը, Արայիկ Հարությունյանը, Սամվել Շահրամանյանը պետք է պատասխան տան ու կանգնեն դատարանի առաջ, նրանք կործանեցին Արցախը»,- հայտարարել էր Սամվել Բաբայանը՝ նշելով, թե վերոնշյալ անձինք հայտարարել են, որ Հայաստանը պետք է զորքերը հանի Արցախից, այնինչ ՀՀ-ն Արցախում զորք չունի, ինչպես նաև ամբողջ բանակի զենքը առանց որևէ բան վնասելու հանձնել են Ադրբեջանին։

Իրավապահներն ուսումնասիրել են Բաբայանի ՝ հոկտեմբերի 6-ի հայտարարությունները և քրեական վարույթ նախաձեռնել։ ՀՀ գլխավոր դատախազությունից «Փաստինֆո»-ի հետ զրույցում հայտնեցին, որ վարույթը նախաձեռնվել է երկու հոդվածներով՝ «Զինվորական պաշտոնեական անփութությունը» (Քրեական օրենսգրքի հոդված 550)՝ ռազմական դրության, պատերազմի ժամանակ կամ մարտի պարագաներում հրամանատարի կամ պաշտոնատար անձի կողմից իր ծառայողական պարտականությունների կատարման նկատմամբ անբարեխիղճ կամ անփույթ վերաբերմունքի հետևանքով դրանք չկատարելը կամ ոչ պատշաճ կատարելը, ինչպես նաև «Մարտ վարելու միջոցները հակառակորդին հանձնելը կամ թողնելը» (ՔՕ հոդված 545)՝ առանց մարտի հանգամանքներով հարկադրված լինելու հրամանատարի (պետի) կողմից ամրությունը, մարտական տեխնիկան կամ մարտ վարելու այլ միջոցը հակառակորդին հանձնելը կամ թողնելը։ Դատախազության փոխանցմամբ՝ գործով մեղադրյալներ այս պահի դրությամբ չկան:

Հատկանշական է, որ Սամվել Բաբայանը նույն օրը նաև «ինքնախոստովանական» ցուցմունք է տվել, որով փաստացի արձանագրվում է, որ վերջինս իշխանությունների թիկունքում բանակցություններ է վարել Ադրբեջանի իշխանությունների հետ, անգամ չի տեղեկացրել Արցախի իշխանություններին այդ «շփումների» մասին, չգիտես ինչու, իրավապահների աչքից կրկին վրիպել է։ Ընդ որում, սա այն դեպքում, որ Սամվել Բաբայանի «ինքնախոստովանությունը» ոչ այլ ինչ է, քան՝ առերևույթ հաղորդում՝ պետական դավաճանության, գուցե՝ լրտեսության հատկանիշներով։ Ի դեպ, Սամվել Բաբայանի՝ հոկտեմբերի 6-ի հայտարարություններից հետո ադրբեջանցիներն առևանգել են Արցախի ութ ռազմաքաղաքական գործչի, որոնց մի մասին՝ Լաչինի անցակետից, որով Սամվել Բաբայանն աննկատ անցել է, քանի որ ադրբեջանցիներն իրեն չեն ճանաչել, ինչի մասին էլ Բաբայանը հայտարարել էր հարցազրույցում՝ փաստացի «ականներ» տեղադրելով իրենից հետո ՀՀ տեղափոխվող և դեռևս Արցախում գտնվող անձանց համար։

Նկատենք, որ խոսքը գնում է Արցախի հանրապետության տարածքում կատարված ենթադրյալ գործողությունների մասին, մինչդեռ Արցախի տարածքը, ըստ Փաշինյանի, Հայաստանի Հանրապետություն չէ, այլ Ադրբեջան, հետեւապես հարց է առաջանում, թե իրավական ինչ կարգավորման շրջանակներում է ՀՀ գլխավոր դատախազությունը վարույթ նախաձեռնել։ Միաժամանակ պարզ չէ, թե ինչ իրավակարգավորմամբ է, որ դատախազությունը վարույթ չի նախաձեռնել Փաշինյանի նոյեմբերի 9-ի փաստաթղթով ու դրանից հետո այդ թվում ՀՀ ինքնիշխան տարածքից թշնամուն հողեր նվիրելու փաստերի առնչությամբ։
Դատախազությունը փաստացի ընդունում է ՀՀ իրավազորությունը Արցախի նկատմամբ ու անուղղակի փաստում Նիկոլ Փաշինյանի կողմից ՀՀ տարածքային ամբողջականությամբ ուղղված հանցագործության կատարումը։ Սա, ըստ էության, խոստովանություն է, որ համարձակություն չունեն քրգոծրծ հարուցել Փաշինյանի դեմ, քանի որ մեր երկրւմ սահմանադրական կարգը տապալված է ու իշխանության բոլոր ճյուղերը Նիկոլ Փաշինյանը յուրացրել է։

Հեղինակ՝ Իզաբել Սահակյան

Աղբյուր` Փաստինֆո