Փաստ ինֆո

Եվ՛ Արցախի, և՛Հայաստանի Հանրապետության ղեկավարները հանցագործություններ են կատարել՝ Արցախի հանձնման գործով, որովհետև Արցախը հանձնելը կոնկրետ քայլ է, բայց հանձնելուն գնալը երկարատև ժամանակ է պահանջել,-«Փաստինֆո» լրատվականի հետ զրույցում ասում է քաղաքագետ Ստեփան Դանիելյանը, մեկնաբանելով այսօր հայտնի դարձած տեղեկությունը, համաձայն որի՝ իրավապահներն ուսումնասիրել են Սամվել Բաբայանի ՝ հոկտեմբերի 6-ի հայտարարությունները և քրեական վարույթ նախաձեռնել։

Հիշեցնենք՝ ՀՀ գլխավոր դատախազությունից հայտնել են, որ երկու հոդվածներով վարույթ է նախաձեռնվել՝ «Զինվորական պաշտոնեական անփութությունը» (Քրեական օրենսգրքի հոդված 550)՝ ռազմական դրության, պատերազմի ժամանակ կամ մարտի պարագաներում հրամանատարի կամ պաշտոնատար անձի կողմից իր ծառայողական պարտականությունների կատարման նկատմամբ անբարեխիղճ կամ անփույթ վերաբերմունքի հետևանքով դրանք չկատարելը կամ ոչ պատշաճ կատարելը, ինչպես նաև «Մարտ վարելու միջոցները հակառակորդին հանձնելը կամ թողնելը» (ՔՕ հոդված 545)՝ առանց մարտի հանգամանքներով հարկադրված լինելու հրամանատարի (պետի) կողմից ամրությունը, մարտական տեխնիկան կամ մարտ վարելու այլ միջոցը հակառակորդին հանձնելը կամ թողնելը։

Քաղաքագետը նկատում է՝ որ Փաշինյանը պետք է դատարանում պատասխան տա, քննարկման ենթակա հարց չէ, բայց սա չի նշանում, թե Արցախի ղեկավարությունը ազատվելու է պատասխանատվության իր բաժնից. «Առաջին հերթին դատարանի առաջ պատասխաններ տվողն, իհարկե, ՀՀ ներկա ղեկավարն է՝ իր վարչախմբով և գուցե՝ ոչ միայն ներկա։ Միակ մտավախությունս այն է, որ այս իշխանությունների օրոք չի կարող Արցախի անկման առնչությամբ արդար դատ սկսել՝ հատկապես այդ հանցանք իրականացրած իշխանությունների հանդեպ։ Իհարկե, շատ ավելի գերադասելի կլիներ, որպեսզի օրվա այս իշխանությունը փոխվեր, նոր ղեկավարություն գար, որը որևէ կապ չէր ունենա կատարվածի հետ, որպեսզի, գոնե, օբեկտիվ և արդարացի դատավարության հեռանկար ունենայինք։ Բայց ես կարծում եմ, որ ոչ օբեկտիվ դատավարության ընթացքում, եթե դրանք բաց լինեն, չափազանց շատ բաներ կարող են պարզ դառնալ»,- ասում է քաղաքագետը։

Դատարանների հայտնի շրջափակումից հետո, Փաշինյանն իր ձեռքի տակ է վերցրել ողջ դատական համակարգը, նշում է Ստեփան Դանիելյանն ու հավելում՝ հիմա նա է «արդարադատության» որոշողը. «Հույս ունեմ միայն, որ ինչ – որ մի ժամանակ նոր ղեկավարություն կգա և հենց ինքը՝ Փաշինյանն առաջինը դատարանի առաջ կկանգնի»։

Լրագրողի նկատառմանը՝ Արցախի փաստացի լուծարման վերաբերյալ ընտրված ժամանակահատվածը՝ 2024 թ. հունվարի 1-ն, արդյո՞ք ազդակ չէր, որ դեռևս կա քիչ, բայց էական ժամանակ՝ լուծելու կապիտուլացիայի հեղինակ իշխանությունների ճակատագիրն ու փոխելու անդառնալի կորուստների այս շղթան, Ստեփան Դանիելյանը պատասխանում է՝ ժամանակ, իհարկե, այս իմաստով մեզ տրվել է, հնարավորություն նույնպես՝ կյանքի կոչելու իշխանափոխության գործընթացը, սակայն այս պահին հայաստանյան ներքաղաքական դաշտի ռեալ պատկերը թույլ չի տալիս ասելու, որ դրան պատրաստ ուժեր նույնպես կան։

Աղբյուր` Փաստինֆո