Փաստ ինֆո

Արհեստածին Ադրբեջանի նախագահը հայտարարել է, որ ղարաբաղյան առաջին պատերազմից հետո, ոչ մի երկիր չի սատարել Ադրբեջանին, բարոյական աջակցություն չի ցուցաբերել։«Բոլոր հիմնական ուժերը սատարեցին Հայաստանին, և այսօրվա պատմությունը դա ևս մեկ անգամ ցույց է տալիս։ Տեսեք, թե որ երկրներն են այսօր առավել թշնամաբար վերաբերվում Ադրբեջանին։ Այն երկրները, որոնք այդ ժամանակ՝ 1992-1993 թվականներին, Հայաստանի կողքին էին, նրանց հրահրում էին օկուպացիայի, աջակցում էին օկուպացիային և արդարացնում նրանց։ Այս 30 տարիների ընթացքում ոչինչ չի փոխվել»։

Այս մասին հոկտեմբերի 15-ին Ստեփանակերտ քաղաքում Ադրբեջանի պետական դրոշի բարձրացումից հետո ելույթի ժամանակ ասել է նախագահ Իլհամ Ալիևը: Նրա խոսքերը մեջբերում է «Ազերթաջը»։

«Փաստինֆո»-ն ավելի վաղ հայտնել է, որ ադրբեջանցիներն ավելի քան 9 ամիս շրջափակման մեջ գտնվող Արցախի նկատմամբ սեպտեմբերի 19-ին սանձազերծեց ռազմական ագրեսիա՝ թիրախավորելով խաղաղ բնակիչներին, որոնց տարհանելու հնարավորություն ուղղակի չկար։ Մեկ օր կատաղի դիմադրություն ցույց տալուց հետո՝ Արցախի իշխանությունները պարտադրված ընդունեցին կրակը դադարեցնելու ադրբեջանական պայմանը, այն է՝ լուծարել ՊԲ-ն ու սկսել ինտեգրացիա։ Ավելին, Բաքուն ներկայացրել էր նաեւ ցուցակ՝ Արցախի Հանրապետության կայացման գործում դերակատարում ունեցող անձանցից բաղկացած՝ պահանջել էր նրանց հանձնել, ըստ էության՝ դա սահմանելով խաղաղ բնակչության փրկագինը։

Հաշված օրերի ընթացքում Արցախը հայաթափվեց ու ավելի քան 100.000 հայ գաղթեց Հայաստան։Իսկ Արցախի հանրապետությունն օկուպացված է Ադրբեջանի կողմից:

Աղբյուր` Փաստինֆո