Փաստ ինֆո

Արցախցիներին Հայաստանում ընդունելու և տեղավորելու գործընթացը բավական ծանր գործընթաց էր, թե հոգեբանական առումով, թե կազմակերպչական առումով։ Այս մասին այսօր Երևանի քաղաքապետի երդմնակալության արարողությունից հետո ասաց ՀՀ տարածքային կառավարման և ենթակառուցվածքների նախարար Գնել Սանոսյանը՝ անդրադառնալով լրագրողների հարցին, թե տարբեր քաղաքների մարզադահլիճներում մի քանի տասնյակ արցախցի տեղահանվածներ կան, ինչ է արվում նրանց նորմալ կացարաններում տեղավորելու համար։

«Մարզերում տեղակայված է 80 հազար մարդ։ Ամենօրյա վիճակագրություն ենք վարում, թե բռնի տեղահանված մեր հայրենակիցներից քանիսն են հյուրանոցներում, քանիսն են հյուրատներում, կամ հարմարեցված կամ ոչ այդքան հարմար շենք շինություններում։ Գիտենք՝ ով է սնունդ տանում, ով ինչի կարիք ունի, ում պետք է բուժել, ով է արդեն բուժվել, ում է պետք տեղափոխել հիվանդանոց։

Նա ընդգծեց, որ մարզերում գտնվող 80 000 քաղաքացիներից միայն 1600-ն է հարմարեցված շինություներում։

«Միակ տեղը, որտեղ համատարած բնակեցված են եղել՝ Արտաշատի սպորտդպրոցի դահլիճն է եղել, որտեղ եղել է 104 մարդ, բոլորին տեղաբաշխել ենք, հիմա այնտեղ մնացել է մեկ ընտանիք, նրանք այլ տեղ են տեղափոխվելու, խնդրել են ևս 2 օր մնալ»։
Նա նաև նշեց, որ եթե որևէ գյուղում 10 տուն է բացվել, որտեղ բռնի տեղահանված մեր հայրենակիցները տեղակայվել են՝ 10-ից առնվազն 8-9-ը տրվել է անհատույց։ «Իհարկե, մյուս հայրենակիցները, ովքեր դեռ հյուրանոցներում են՝ մեր խնդրանք է, որ օգնենք, որպեսզի նրանք էլ առանձնատներում տեղայակվեն։ Կարծում եմ, համաձայն եք, որ հյուրանոցում երկար ժամանակ ապրելն հարմար չէ, երկրորդ՝ իրենց ծածկը կունենան, իրենց տնտեսությունը կզարգանա, բացի այդ՝ դրանք նախատեսված են տուրիզմը զարգացնելու համար»։

Աղբյուր` Փաստինֆո