Փաստ ինֆո

Իշխող «Քաղաքացիական պայմանագիր» կուսակցության առջև 3 խնդիր է դրված, քանի դեռ այս ուժը այդ 3 խնդիրները չի լուծել՝ իշխանությունից չի հեռանա, եթե ֆորսմաժորային իրավիճակ չլինի։ Այս մասին «Փաստինֆոյի» հետ զրույցում ասաց քաղտեխնոլոգ Արմեն Բադալյանը։

«Առաջին խնդիրը Արցախն ամբողջությամբ հայաթափելն ու Ադրբեջանին հանձնելն է, երկրորդը՝ Ռուսաստանի հետ ռազմաքաղաքական և տնտեսական հարաբերությունների խզումը, երրորդը՝ Զանգեզուրի միջանքի բացումը, քանի դեռ այս 3 կետերը կատարված չեն՝ արևմուտքը թույլ չի տալու որ իրենք հեռանան։

Ընդ որում՝ իշխանություն հանձնել-չհանձնելու գործն իրենցից չի կախված, իրենք ինքնուրույն քաղաքական ուժ չեն, որ իշխանություն հանձնեն, իրենք Արևմուտքի կողմից նշանակված խամաճիկային քաղաքական կառավարություն են։ Ավելին՝ եթե երկրում որևէ ֆորսմաժորային իրավիճակ չլինի՝ այս իշխանություններն ինքնակամ չեն հեռանա, իշխանությունն հանձնելու փորձեր էլ չեն լինի»։

Բադալյանն ընդգծեց, որ գործող իշխանությունն իր առջև դրած խնդիրներց մեկն արդեն լուծել է. Արցախը հայաթափված է։ «Երկորդն ընթացքում է, մասնավորապես, ՀԱՊԿ-ի հետ հարաբերություններն արդեն խզված են, ԱՊՀ-ի հետ խզման գործընթացը սկսված է։

Երրորդը՝ Զանգեզուրի միջանցքի հարցը հիմա փորձում են լուծել։ Դրա համար պետք է հուշագիր ստորագրվեր Գրանադայում, ինչը տեղի չունեցավ՝ Ադրբեջանի պատճառով։ Քանի դեռ իրենք այս 3 խնդիրները չեն լուծել, իրենց իշխանությունը չի փոխարինվելու մեկ այլ իշխանությամբ։ Ընդ որում՝ ոչ թե իրենք են գնալու, այլ հենց Արևմուտքն է իրենց փոխարինելու այս կամ այն ուժով»։

Նկատենք, որ ՔՊ-ն զիջեց դիրքերը մայրաքաղաքում, իջեցրեց նշաձողն ու կոալիցիոն կառավարում ստանձնեց «Հանրապետություն» կուսակցության հետ։ Ընդ որում, թե Փաշինյանը, թե Ավինյանը չեն բացառել, որ կոալիցիոն կառավարման մոդելը կարող կիրառվել այլ համայնքներում եւս։

Քաղտեխնոլոգի գնահատմամբ՝ պատահական չէր, որ Երևանում հենց «Հանրապետություն» կուսակցությունն ընտրվեց կոալիցիոն կառավարման համար։ «Հենց այս ուժն էր, որը Երևանում ուներ համապատասխան ընտրազանգված, իր էությամբ հանդիսանում էր արևմտամետ ուժ, այս ուժի ղեկավարը իշխող քաղաքական ուժի առաջնորդի հետ ունեցել է հարաբերություններ, նրա վրա արևմտյան ազդեցությունները բավական ուժեղ են, միաժամանակ, ունի որոշակի ճանաչելիություն, համապատասխան կազմակերպչական կառույցներ։ Այսինքն, կային որոշակի գործոններ, որոնցով հենց այս կուսակցությունն էր նախընտրելի պայքարի մեջ մտած մնացած բոլոր արևմտամետ ուժերից։ Հատկանշական է նաև, որ նաև ՔՊ-ականներն էին աշխատում «Հանրապետություն» կուսակցության համար, որպեսզի ոչ թե Ավինյանը շատ ձայներ ստանա, այլև հենց «Հանրապետությունը»։

Դիտարկմանը, որ թե Ավինյանը, թե Փաշինյանը հնարավոր են համարում, որ ապագայում նաև խորհրդարանական ընտրություններում կունենաք կոալիցիոն մեծամասնություններ և կոալիցիոն կառավարություն՝ Բադալյանն ասաց, որ ոչինչ բացառել հնարավոր չէ Հայաստանում։ «Բայց պետք է մի բան հստակ իմանալ. ՏԻՄ ընտրությունները մի բան են, իսկ կենտրոնականն ընտրությունները՝ բոլորովին այլ։ Ոչինչ չի բացառվում, բայց հաջորդ խորհրդարանական ընտրությունները միայն 2026-ին են, մինչև այդ դեռ ապրել է պետք»։

Աղբյուր` Փաստինֆո