Փաստ ինֆո

Լևոն Քոչարյանի գործով միակողմանի և տարբերակված մոտեցում է ցուցաբերվել։ Վարույթն իրականացնող մարմինն անգամ օբյեկտիվորեն զննության չի ենթարկվել տեսանյութերը։ Տվյալ դեպքում ունենք իրվիճակ, որ կարմիրբերետավորների ցուցմունքները հերքում է տեսանյութերում արտացոլվող իրողությունը, մինչդեռ, որպես օբյեկտիվ փաստական տվյալ համարվում է տեսանյութը, եթե այն մոնտաժված չէ, առանց միջամտության է, իսկ այժմ նման խնդիր չկա, տեսանյութերը գործով ապացույց են ճանաչվել։ Այս մասին հրավիրված մամուլի ասուլիսին ասաց ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի փաստաբան Էրիկ Ալեքսանյանը։

«Հարց է առաջանում՝ եթե ունենք օբյեկտիվ ապացույց՝ տեսանյութ, որում տեսնում ենք, որ իրականում Լևոն Քոչարյանը Հրաչիկ Խաչատրյանին (ոստիկանին, որին իբրև հարվածել է Լևոն Քոչարյանը հեղ․) ոտքերով չի հարվածել, չէր էլ կարող, քանի որ նա գտնվում էր Լևոն Քոչարյանի հետնամասում, այսինքն, օբյեկտիվորեն Լևոն Քոչարյանը չէր կարող հարվածել, ապա ինչու է Լևոն Քոչարյանը կալանավորված, ինչու է հարուցվել այս շինծու հետապնդումը։ Մենք կարող ենք դատողություններ անել, սակայն այս հարցի պատասխանը պետք է տա մեղադրանքի կողմը և հանրությունը պետք է տեսնի, որ այն, ինչ ներկայացնում է պետությունը՝ ի դեմս քրեական հետապնդման մարմինների, իրականությանը չի համապատասխանում»,- նշեց Ալեքսանյանը։

Ինչ վերաբերում է ավտոմեքենայում իբրև ոստիկանության երկու ծառայողի նկատմամբ բռնության դրվագին, ապա փաստաբանը վստահեցնում է, որ առկա չէ դատաբժշկական որևէ փորձաքննություն, որով կարձանագրվեր ոստիկանների նկատմամբ բռնությունը, փոխարենը, առկա է բժշկական մի շարք փաստաթղթեր՝ Լևոն Քոչարյանի ստացած վնասվածքների մասին, սակայն մեղադրյալի կարգավիճակում այժմ նա է։

«Կազուսային իրավիճակ է՝ մեզ ասում են մենք ենք ծեծի ենթարկել ոստիկաններին, բայց նրանք չունեն վնասվածքներ, ասում ենք՝ մենք ենք ծեծի ենթարկվել, ունենք բժշկական փաստաթղթեր վնասվածքների վերաբերյալ, բայց մեզ չեն հավատում, ոստիկաններին են հավատում»,- նշեց փաստաբանը՝ հավելելով, որ միակողմանի քննություն է իրականացվում, քանի որ ՀՀ-ում արդեն ձևավորվել է կարծրատիպը, որ քրեական վարույթներով այլևս չեն նայում փաստերին, ողջամտությանը, այլ՝ նայում են, թե ով է անցնում այդ գործով, ում վերաբերյալ է քննվում վարույթը, ինչը ճիշտ մոտեցում չէ, դա պետք է վերջ տրվի ՀՀ-ում։ Օբյեկտիվ քննության դեպքում Լևոն Քոչարյանը չէր կարող կալանավորվել։ Փաստաբանը նաև հիշեցրեց, որ կալանավորման որոշում կայացրել է դատավոր Մասիս Մելքոնյանը, որին ինքնաբացարկի միջնորդություն էր ներկայացվել, քանի որ Մելքոնյանը մինչ դատավոր դառնալը եղել է քաղաքական դերակատար, զբաղվել քաղաքականությամբ և ունեցել է բացասական դիրքորոշում Ռոբերտ Քոչարյանի նկատմամբ՝ հրապարակային հայտնելով իր բացասական դիրքորոշումը Քոչարյանի վերաբերյալ, սակայն, Մասիս Մելքոնյանը մերժել է ինքնաբացարկի միջնորդությունը՝ նշելով, թե դատավորը երդվել է լինել անկողմնակալ, հետևաբար, կարող է քննել միջնորդությունը։

«Մեծ հաշվով, պարոն Մասիս Մելքոնյանի ասածն այն էր, որ ես երդվել եմ՝ լինել անաչառ դատավոր։ Սա, անկեղծ ասած, չեմ կարող բնութագրել, թե ինչ հիմնավորում է»,- ասաց փաստաբանը։

Նշենք, որ երեկ ոստիկանության երկու ծառայողի և Լևոն Քոչարյանի մասնակցությամբ առերեսում է եղել, փաստաբանը կարծում է, որ մյուս երկու ոստիկանների հետ առերեսումները ձգձգվում են՝ «արհեստականորեն»՝ կալանավորման ժամկետի երկարացման ընթացքում քննչական գործողություններ կատարելու անհրաժեշտությունը որպես հիմք ներկայացնելու համար։

Աղբյուր` Փաստինֆո