Փաստ ինֆո

Արցախից բռնի տեղահանված ուսուցիչներին արտամրցութային կարգով աշխատանքի անցնելու հանրավորություն կընձեռնվի։ Այդ մասին Գործադիրի նիստում ասաց փոխվարչաետ Տիգրան Խաչատրյանը՝ հավելելով, որ 1500 թափուր տեղ կա դպրոցներում, որոնց կարող են հավակնել նաև ԼՂ-ից տեղահանված ուսուցիչները։

Բացի աշխատավարձից, նաև 30 տոկոս հավելավճար կստանա այդ դեպքում։ Ունենք բնակավայրեր, որտեղ 30 տոկոս հավելավճարից բացի, նաև 50 հազար դրամ հավելավճար կավելանա։ Դրանց շարքում են Սյունիքի և Վայոց ձերի մարզերի որոշ բնակավայրեր, Ճամբարակի ու Վարդենիսի որոշ բնակավայրեր, ինչպես նաև Իջևան և Բերդ համայնքների բնակավայրերը»,-նշեց Խաչատրյանը։

ԿԳՄՍ նախարար Ժաննա Անդրեասյանն էլ հավելեց․ «Վաղվանից կգործի հարթակ, որտեղ ուսուցիչները, մուտքագրելով իրենց էլեկտրոնային հասցեն, կգրանցվեն և արդեն իսկ հասանելի կդառնա թափուր աշխատատեղերի բազան՝ ըստ դասավանդման առարկաների ու բնակավայրերի։ Եթե մտափոխվեն, կկարողանա 10-օրյա ժամկետում չեղարկել նախորդ դիմումը ու ևս մեկ անգամ ընտրել»։
Ուսանողներն էլ, որոնք Արցախում բարձրագույն և միջին մասնագիտական կրթություն էին ստանում, հնարավորություն ունեն իրենց ուսումը շարունակելու հայաստանյան բուհերում՝ ստանալով կրթաթոշակ։ Կրթաթոշակի չափը կախված կլինի մասնագիտությունից։
Անդրեասյանը վստահեցրեց, թե կրթաթոշակի այնպիսի չափեր են ընտրվել, որ ուսանողների ուսման վարձը դրանով հնարավոր լինի փոխհատուցել ու հորդորեց՝ ընտրել այնպիսի բուհեր, որ դա հնարավոր լինի անել։

Արդեն 500 ուսանող բուհերից, այդքան էլ միջին մասնագիտական ուսհաստատություններից դիմել են։
ԿԳՄՍ նախարարի խոսքով՝ այս պահի դրությամբ հայաստանյան դպրոցներում ուսումը շարունակում է Արցախից բռնի տեղահանված 13000 երեխա։ Նա նաև նշեց, որ կան տարբեր համայնքներում, հյուրատներում, կացարաններում հանգրվանած երեխաներ, որոնց դպրոց հասնելը խնդիր է։

Աղբյուր` Փաստինֆո