Փաստ ինֆո

Ովքե՞ր ներքաղաքական խոսույթ և քննարկման դաշտ մտցրին Ալեքսանդրապոլի պայմանագիր եզրույթը և ի՞նչ նպատակով դա արվեց։ Իհարկե, սա, անկասկած, հայաստանյան օրվա այս իշխանությունների ձեռագիրն էր, որով նրանք, աստիճանաբար, մարդկանց ականջներին սովորական դարձնելու, ընտելացնելու նպատակով հիշեցնում են ընդամենը 10.000 քկմ տարածքով երբեմնի Հայաստանի պատմությունը, հող նախապատրաստելով՝ հենց այդպիսի ապագայի համար, որովհետև սա նրանց և նրանց գործընկեր՝ թուրք – ադրբեջանական տանդեմի երազանքն ու նպատակն է,-«Փաստինֆո» լրատվականի հետ զրույցում ասում է «Արեւմտահայոց հարցերի ուսումնասիրության կենտրոն»-ի տնօրեն, հայագետ Հայկազուն Ալվրցյանը։

Հիշեցնենք, նախօրեին Նիկոլ Փաշինյանը հերթական հարցազրույցն էր տվել Հանրային հեռուստաընկերությանը, որի ընթացքում, ի թվիս բազմաթիվ վիճարկելի մտքերի, ակնարկեց նաև ՀՀ-ից տարածքային հնարավոր կորուստների մասին։ «Եթե սկսենք խոսել այն մասին, թե ի՞նչ է ուզում Ադրբեջանը, ապա կարող է պարզվի, որ նա ուզում է 5000 քկմ տարածքով Հայաստան»,-ասել է ՀՀ-ում վարչապետ աշխատող անձը։

Հայկազուն Ալվրցյանը նկատում է՝ վերջերս բուռն քննարկման թեմա դարձած, այսպես կոչված, անկլավների հանձնման հարցը, եթե, իհարկե, դա իրականություն դառնա, տարածքային կորուստների իմաստով չարյաց փոքրագույնն է լինելու Հայաստանի համար. «Առանց Փաշինյանի արած այս կամ այն հայտարարությունների և հարցազրույցների էլ՝ ես հստակ գիտեմ, որ նա պանթուրքիզմի իրականացման ակտիվ ջատագովներից և մասնակիցներից մեկն է։ Նա պարտավորվել է Հայաստանից այնքան տարածք զիջել թուրք – ադրբեջանական տանդեմին, որը լիարժեք հնարավորություն կտա իրականություն դարձնել Մեծ Թուրանը կյանքի կոչող, այսպես կոչված, միջանցքի անխափան գործարկմանը։

Որպեսզի Ադրբեջանն ավելի լայն շերտով միավորվի Թուրքիայի հետ, սրանք ոչ միայն Սյունիքից՝ Մեղրիից, Նախիջևանի հետ կապող տարածքներ կհանձնեն, այլև՝ Երասխից նույնպես։ Եվ սա դեռ միայն Հայաստանի հարավային սահմանների մասին եմ խոսում։ Չմոռանանք, որ Ադրբեջանը լուրջ տարածքային հավակնություններ ունի նաև Արարատի մարզից, Գեղարքունիքից, ընդ որում, նա ցանկանում է ձեռք գցել Սևանի ուղիղ կեսը, ինչպես նաև՝ Հայաստանի հյուսիսից՝ Տավուշի մարզից, որոնք, նույնպես, առանց որևէ դիմադրության այս իշխանությունները պատրաստ են հանձնել մեր թշնամուն։ Այնպես որ, երբ Փաշինյանն իր հերթական ելույթներում ասում է, թե Ադրբեջանը Հայաստանից, ընդամենը, 5000 քկմ տարածք է ուզում թողնել, ես խորհուրդ կտայի նրա այդպիսի հայտարարությունները խիստ զգուշավոր մեկնաբանել, որովհետև Փաշինյանի օրոք պետք է մտահոգվել ոչ թե 5000 քկմ տարածքով Հայաստանի, այլ, առհասարակ, Հայաստան ունենալու համար»,-ասում է հայագետը։

Փաշինյանական հերթական խելագար հայտարարություններն իրականություն դառնալու մեծ հավանականություն ունեն, որովհետև նրա ձեռքը ո՛չ դրսից, ո՛չ ներսից բռնող չկա, ասում է բանախոսն ու հավելում.«Եթե նա շարունակի մնալ իշխանության ղեկին, այն էլ՝ այն վստահությամբ, որն այսօր ունի, միաժամանակ, վայելելով թուրք – ադրբեջանկան տանդեմի, ինչպես նաև, ինչքան էլ որ տարօրինակ է հնչում՝ ՌԴ-ի հովանավորչությունը, նույնպես, ապա Հայաստանի հեռանկարն, իսկապես, խիստ մշուշոտ է դառնում»։

Ամփոփելով զրույցն, «Արեւմտահայոց հարցերի ուսումնասիրության կենտրոն»-ի տնօրեն, հայագետ Հայկազուն Ալվրցյանը նկատում է՝ ահա այսպիսի անփառունակ հեռանկարը թույլ չտալու համար էր, որ տարիներ շարունակ ահազանգում և բարձրաձայնում է՝ հնարավոր և անհնար անխտիր բոլոր միջոցներով ժամ առաջ պետք է ազատագրվել այսպիսի իշխանություններից՝ կանխելու համար Հայաստանի գլխին՝ թուրք -ադրբեջանական տանդեմի կողմից բերվող նորանոր ու անդառնալի աղետների այս շղթան, սակայն, հայ ժողովուրդը անհասկանալի կերպով կորցրել է ինքնապաշտպանվելու իր բնազդն ու սեփական հողն ու Հայրենիքը պաշտպանելու իմունիտետը։

Աղբյուր` Փաստինֆո