Փաստ ինֆո

Լեռնային Ղարաբաղի ողջ բնակչությունը՝ ավելի քան 100 հազար հայեր, ստիպված է եղել լքել իրենց տներն ու շրջանները։ Նախնիների հայրենիքը լքելու համար ծանրակշիռ պատճառներ կան, նրանք դա արել են Ադրբեջանի «երկաթե բռունցքի» հարվածների տակ։ Այս մասին ՄԱԿ-ի արդարադատության միջազգային դատարանում «ՀՀ-ն ընդդեմ Ադրբեջանի» գործով լսումների ընթացքում ասաց Հայաստանի հայցը ներկայացնող փաստաբաններից Լոուրենս Մարտինը։

«Ալիևն ասել է, որ հայերը շներ են, որոնց պետք է դուրս քշել Լեռնային Ղարաբաղից։ Լեռնային Ղարաբաղի էթնիկ հայերը քաջատեղյակ են Ադրբեջանի այս քաղաքականությանը, որտեղ երեխաներին օրորոցից սովորեցնում են ատել հայերին։ Դպրոցական դասագրքերում գրում են, որ հայերին պետք է ատել, և հայերին անվանում են սատանայի արյուն ունեցող անձինք»,- արձանագրեց Մարտինը՝ ներկայացնելով փաստերը։

Բացի այդ, Լոուրենս Մարտինը հիշեցրեց, թե ինչպես է Ռամիլ Սաֆարովը կացնահարելով սպանել քնած հայ սպային և փորձել սպանել ևս մեկ հայ սպայի։

«Ալիևը նրան պարգևատրել է՝ շնորհելով զինվորական ավելի բարձր կոչում, և 8 տարվա աշխատավարձ տվել։ Այժմ նա օրինակ և հերոս է այնտեղ»,-ասել է նա:

Նրա դիտարկմամբ՝ Դատարանը պետք է ուսումնասիրի 44-օրյա պատերազմի ընթացքում հայերի ջարդերը տոնող ադրբեջանցիների կադրերը։ Նա ընգդծեց, որ քաղաքացիական անձինք և զինվորականները ծաղրում էին զոհված հայերի մարմինները, Բաքվում ստեղծվել է հայերի ռասիստական պատկերներով պուրակ։ Նրա խոսքով՝ թեև Ադրբեջանը խոստացել էր հնարավորություն տալ հայերին վերադառնալ օկուպացված տարածքեր, դա այդպես էլ տեղի չի ունեցել, ավելին, Լաչինի միջանցքի ևս մի քանի գյուղ հայաթափվել են։ Նա նաև հիշեցրեց՝ Ադրբեջանի կողմից թողարկված «Ղարաբաղը հայերից «ախտահանելու»» մասին դրոշմանիշը, իսկ վերջին իրադարձությունները, որին նախորդել էր շրջափակումը, գործընթացի գագաթնակետն են։

Մանրամասները՝ տեսանյութում

Աղբյուր` Փաստինֆո