Փաստ ինֆո

ՀՀԿ փոխնախագահ Արմեն Աշոտյանը կշարունակի մնալ կալանավորված։ «Փաստինֆո»-ի թղթակցի հաղորդմամբ՝ Հակակոռուպցիոն դատարանը՝ դատավոր Վահե Դոլմազյանի նախագահությամբ, քիչ առաջ հրապարակեց Արմեն Աշոտյանի նկատմամբ ընտրված խափանման միջոց կալանավորման ժամկետը ևս երեք ամսով երկարացնելու որոշումը։

Ինչպես արդեն տեղեկացրել ենք՝ այսօրվա նիստում դատարանը քննում է Արմեն Աշոտյանի խափանման միջոցի հարցը։ Պաշտպանության կողմը միջնորդել է վերացնել Աշոտյանի նկատմամբ որպես խափանման միջոց կիրառված կալանքը և այն փոխարինել անազատության հետ չկապված խափանման միջոցով։ Պաշտպանության կողմը, մասնավորապես, որպես այլընտրանքային խափանման միջոց առաջարկել է գրավը՝ 40 մլն դրամի չափով, տնային կալանքը և անձնական երաշխավորությունը։ Հանրային մեղադրողները առարկել են՝ հայտարարելով, թե գորոծով դեռևս պետք է հարցաքննվեն վկաները, և, Աշոտյանը, գտնվելով ազատության մեջ, կարող է խոչընդոտել գործի քննությանը՝ ազդելով վկաների վրա։

Դատավորը որոշումը հրապարակեց խափանման միջոցի հարցի քննարկման ավարտից անմիջապես հետո։ Պաշտպանության կողմը ժամանակ խնդրեց՝ նախագահողին ինքնաբացարկի միջնորդություն ներկայացնելու համար։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո